قازاقستاننىڭ سىرتقى ىستەر مينيسترلىگى ازاتتىق راديوسىنىڭ تىلشىلەرىنە اككريديتاسيا بەرمەي جاتىر دەيدى.

ياعني، شەتەلدەن قارجىلاندىرىلاتىن ب ا ق قازاقستاندا جۇمىس ىستەمەسىن دەگەن ماقساتتا-مىس.

ءبىراق شەتەلدەن اقشا الاتىن جالعىز ازاتتىق ەمەس ەكەنىن نەگە ەسكەرمەيدى دەگەن سۇراق تۋىندايدى. بىزدە رەسەيلىك سپۋتنيك سەكىلدى باسقا دا شەتەلدىك باق-تار جۇمىس ىستەيدى.

ازاتتىق ءجۋرناليسى ايان قالمۇراتتىڭ سوزىنە كەلسەك، ول ازاتتىق تىلشىلەرىنە «ەلدىڭ ۇلتتىق قاۋىپسىزدىنە قاتەر ءتوندىردى» دەگەن سەبەپپەن اككريديتاسيا بەرىلمەي وتىرعانىن ايتادى.

– ازاتتىقتىڭ قاندى قىرعىن ەڭبەگىنە كۋاسىزدەر. مەنىڭ بار ارمان-ماقساتىم ءسوز بوستاندىعى جوق ەلدە باسقا ارىپتەس ەرىكتى دە ەرىكسىز كورسەپتەي وتىرعان جايتتاردى كورسەتۋ ەدى. وسى جۇمىسىمدى قازاقستان بيلىگى «ەلدىڭ ۇلتتىق قاۋىپسىزدىنە قاتەر ءتوندىرۋ» دەپ ساناپ وتىرعان سياقتى. ماعان سىرتقى ىستەر مينيسترلىگى بيىل اكككرەديتاسيا بەرگەن جوق. مەن ءوز ەلىمدە زاڭدى تۇردە جۋرناليست رەتىندە جۇمىس ىستەي المايمىن. جۋرناليست رەتىندە بيلىك وكىلدەرىنە، پوليسيا مەن سوتقا سۇراق قويا المايمىن. مەن عانا ەمەس، ازاتتىقتاعى 35 ارىپتەسىمە مينيسترلىك اككرەديتاسيا بەرۋدەن باس تارتتى.

اككرەديتاسيا نەگە بەرمەي وتىر، ماقساتى نە دەيسىز عوي... كەشە ءماجىلىستىڭ ەكى دەپۋتاتى –  نيكيتا شاتالوۆ پەن اناس باققوجايەۆ ۇسىنىس ايتتى. ولار ايتقان نورما بويىنشا، بۇدان بىلاي قازاقستان بيلىگى شەتەلدىك ب ا ق پەن ونىڭ جۋرناليستەرى «ەلدىڭ ۇلتتىق قاۋىپسىزدىگىنە قاتەر ءتوندىردى» دەپ تاپسا، باسىلىم مەن ونداعى جۋرناليستەرگە اككرەديتاسيا بەرمەي قويا الادى. ارتىنشا اككرەديتاسياسى جوق باسىلىم مەن ونىڭ تىلشىلەرىنە جۋرناليستىك قىزمەتپەن اينالىسۋعا تىيىم سالادى. مەن شوك بوپ ەس جيا الار ەمەسپىن. قازىرگى بيلىك قازاقستاندى قانداي ەلگە اينالدىرماق؟، – دەدى ايان قالمۇرات.

ال قوعام بەلسەندىسى مۇحتار تايجان تاۋەلسىز جۋرناليستيكاعا توسقاۋىل قويۋ – ءسوز ەركىندىگىن قۇرتۋ دەيدى.

– شىنى كەرەك، ازاتتىق راديوسىنىڭ تىلشىلەرىمەن كەلىسەتىن دە، كەلىسپەيتىن دە جايىمىز بولعان. ول زاڭدى نارسە. ءبىراق ءسوزدىڭ ەركىندىگى – باستى قاعيدا.  ازاتتىقتى جاۋىپ تاستاسا – ەلىمىزدە اشىقتىق البەتتە ازايادى. «اۋرۋىن جاسىرعان ولەدى» دەپ بەكەر ايتپاعان قازاق اتام. سول ءۇشىن اقپارات مينيسترلىگىنەن گوسزاكاز الماي جۇمىس ىستەيتىن جۋرناليستەر كوپ بولسا، سوعۇرلىم ەلىمىز مىقتى بولادى. ازاتتىقتاردا زاڭدى اككرەديتاسيا بولۋى ءتيىس، جالپى، تاۋەلسىز جۋرناليستيكانى قولداۋىمىز كەرەك، – دەگەن پىكىرىن ءبىلدىردى.