ءمامس جارنالارىن ءوسىرۋ تۋرالى باستاما قوعامدا نارازىلىق تۋدىردى. بۇل تۋرالى ءماجىلىس دەپۋتاتى اسحات ايماعامبەتوۆ Telegram ارناسىنا جازدى.  دەپۋتات بۇل ماسەلەنىڭ جۇيەلى تۇردە شەشىلمەي كەلە جاتقانىن ايتىپ ءوتتى. 

"اشىقتىقتىڭ جانە سيفرلاندىرۋدىڭ جوقتىعى، تومەن تاريفتەر، ادىستەمەلىك كەمشىلىكتەر، ءمامس قامتىمايتىن بىرنەشە ميلليون ازامات، گوبمپ جانە ءمامس پاكەتتەرىندەگى شاتاسۋلار. باستاپقىدا قاراستىرىلعان تۇراقتى قارجىلاندىرۋ مودەلى كەيىن وزگەرتىلىپ، مەملەكەتتىك جارنا ستاۆكالارى بىرنەشە ەسە تومەندەتىلدى. ءتىپتى رەسپۋبليكالىق بيۋدجەت جىل سايىن قورعا بەلگىلى ءبىر ازاماتتار ساناتى ءۇشىن اۋداراتىن جارنالار بويىنشا ءوز مىندەتتەمەلەرىن ورىنداماي وتىر"، – دەپ جازدى اسحات ايماعامبەتوۆ.

بۇگىندە ازاماتتاردىڭ اقىلى ەمدەلۋگە كەتەتىن شىعىستارى ازايۋدىڭ ورنىنا ءوسىپ جاتىر.

"سوڭعى 2 جىل ىشىندە قالتا شىعىندارى 27،7%-دان 31،1%-عا دەيىن ءوستى. بۇگىندە مەديسينالىق ۇيىمدارعا قاراجات جەتىسپەيدى. اۋرۋحانالاردىڭ كرەديتورلىق قارىزى ءوسىپ، ازاماتتاردىڭ مەديسينالىق كومەك الۋعا كەزەكتە تۇرۋ ۋاقىتى ۇزاردى. بۇعان قوسا مەديسينالىق كومەكتىڭ قولجەتىمدىلىگى تومەندەدى. وكىنىشكە قاراي، بۇگىندە بۇل قور كلاسسيكالىق ساقتاندىرۋ ۇيىمىنا اينالۋدىڭ ورنىنا، قاراپايىم مەملەكەتتىك ەمەس قورعا اينالدى. جارنالاردى ءوسىرۋ، ازاماتتاردىڭ موينىنا بارلىعىن ارتۋ قانشالىقتى ادىلەتتى؟" – دەدى دەپۋتات.