بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى مەن ونىڭ ايەلىنە سوت ۇكىمى شىقتى.

قىلمىستىق ءىس استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالدى.

سوت ۇكىمىمەن ارىستانبەك مۇحامەدي ۇلى اسا ءىرى مولشەردە پارا بەرۋگە وقتالعانى ءۇشىن كىنالى دەپ تانىلىپ، 11 جىلعا باس بوستاندىعىنان ايىرىلدى.

عاليا ىسقاقوۆا پاراقورلىققا دەلدالدىق جاساعانى ءۇشىن كىنالى دەپ تانىلىپ، ءومىر بويى مەملەكەتتىك قىزمەتتە قىزمەت اتقارۋعا تىيىم سالىنىپ، 6 ايعا باس بوستاندىعىنان ايىرىلدى.

مۇستاقىم تولەيەۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ، 10 جىل مەرزىمگە ادۆوكاتتىق قىزمەتپەن اينالىسۋ قۇقىعىنان ايىرىلا وتىرىپ، 6 جىل 8 ايعا باس بوستاندىعىنان ايىرىلدى.

تەرگەۋ بارىسىندا ارىستانبەك مۇحامەدي ۇلى اسا ءىرى مولشەردە پارا بەرۋگە وقتالدى دەپ (قك 24-بابىنىڭ 3-بولىگى – 367-بابىنىڭ 4-بولىگى)، ايەلى پاراقورلىققا دەلدالدىق جاسادى دەپ (قك 368-بابىنىڭ 1-بولىگى) جانە تولەيەۆ اسا ءىرى مولشەردە الاياقتىق جاسادى دەپ (قك 190-بابى 4-بولىگىنىڭ 2) تارماعى) ايىپتالعان.

"م. (ارىستانبەك) 2022 جىلدىڭ جەلتوقسانىندا استانا قالاسىنىڭ تەرگەۋ يزولياتورىندا بولعان كەزىندە قاماۋدان بوساتىلىپ، «د» قوناق ءۇيىن مەنشىگىندە ۇستاپ قالعىسى كەلىپ، ادۆوكات ت. ارقىلى لاۋازىمدى تۇلعالارعا اسا ءىرى مولشەردە پارا بەرۋگە قىلمىستىق نيەت ءبىلدىردى، بۇل رەتتە ءوزىنىڭ جۇبايى ي.-نى پاراقورلىققا دەلدال رەتىندە تارتۋعا شەشىم قابىلدادى. ءارى قاراي، جۇبايى م.-مەن كەلىسىپ، ت.-مەن كەلىسسوزدەر جۇرگىزىپ، زاڭسىز اقشالاي سىياقىنى لاۋازىمدى ادامدارعا بەرۋ تۋرالى كەلىسىمدى جۇزەگە اسىرۋ ماقساتىندا ت.-عا م.-نىڭ پارا بەرۋگە دايىندىعى تۋرالى حابارلادى. 2022 جىلدىڭ جەلتوقسانىندا ي. كافەدە «د» قوناق ءۇيىنىڭ ماسەلەسىن شەشۋ ءۇشىن ت.-عا 140 مىڭ اقش دوللارىن جەكە ءوزى تابىستادى. 2023 جىلدىڭ قاڭتارىندا جۇبايى ت.-نىڭ كولىگىندە دەلدال ءرولىن اتقارا وتىرىپ، م.-عا قاتىستى بۇلتارتپاۋ شاراسىن وزگەرتۋ ءۇشىن 120 مىڭ اقش دوللارىن ءوزى تاپسىردى"، – دەلىنگەن سوت حابارلاماسىندا.

ۇكىم زاڭدى كۇشىنە ەنگەن جوق.