مىنە، وسى وزگەرىس قولدانىسقا ەنگىزىلگەلى ەل ازاماتتارىندا كوپ سۇراقتار تۋىنداۋدا. اسىرەسە، ەلىمىزدىڭ ءىرى قالالارىندا كولىگىمەن كىسى تاسىپ، ءناپاقا تاۋىپ جۇرگەندەر الاڭداۋلى. سول سەبەپتى Qamshy.kz تاكسي جۇرگىزۋشىلەرى مەن ونلاين اقشا اۋدارىمىنا قاتىستى بارلىق دەرەكتى انىقتاپ، ۇسىنۋدى ءجون كورىپ وتىر.
الماتىدا تاكسي جۇرگىزۋشىسىمىن. ۇنەمى ءموبيلدى تولەمدى پايدالانامىن، كليەنتتەرگە سولاي ىڭعايلى. سوندا مەنەن شامامەن ايىنا قانشا اقشا سالىق رەتىندە ۇستالۋى مۇمكىن؟
مەملەكەتتىك تابىس كوميتەتى بۇل ارادا ونلاين اقشا اۋدارىمى جانە ونلاين تولەم دەگەن ەكى تۇسىنىك بار ەكەنىن ەسكە سالادى. زاڭ بويىنشا، تاكسي جۇرگىزۋشىسى ونلاين اقشا اۋدارىمىن قابىلداۋعا قۇقى جوق. كليەنت ونلاين تولەم جاساۋى ءتيىس. سوندىقتان، زاڭ اياسىندا ارەكەت ەتكىسى كەلەتىن تاكسي جۇرگىزۋشىلەرى، الدىمەن جەكە كاسىپكەر رەتىندە تىركەلۋى شارت. ول ءۇشىن ەشقايدا بارۋدىڭ قاجەتى جوق. ە-Salyq Business، Egov Mobile، سول سەكىلدى ەكىنشى دەڭگەيلى بانكتەردىڭ، مىسالى Halyq bank، Kaspi bank، BankCenterCreditء-تىڭ ءموبيلدى قوسىمشىلارىنا كىرىپ، تىركەلۋگە بولادى.
ودان كەيىن ونلاين اقشا اۋدارىمىن قابىلدايتىن كاسىپكەرلىك بانك شوتىن اشۋ قاجەت بولادى. بۇل ارادا باقىلاۋ-كاسسالىق اپپارات نەمەسە POS-تەرمينال دەگەننىڭ قاجەتى جوق. اقشا جەكە تۇلعاعا ەمەس، جەكە كاسىپكەردىڭ شوتىنا بانكتىڭ QR نەمەسە POS تەرمينالى ارقىلى ءتۇسۋى كەرەك.
ۇساق بيزنەس وڭتايلاندىرىلعان سالىق رەجيمىنە جاتادى. سوندىقتان بۇل ارادا سالىق كولەمى 1-دەن باستاپ 4 پايىزدى قۇرايدى. مىسالى، تاكسي جۇرگىزۋشىسى ايىنا 300-400 مىڭ تەڭگە تابىس تاپتى دەلىك. وندا ودان 1% سالىق الىنادى، ياعني 3000 نەمەسە 4000 تەڭگە كولەمىندە.
ال ەگەر جەكە كاسىپكەر رەتىندە تىركەلمەسەڭىز ءارى ءۇش ايدا شوتىڭىزعا قاتارىنان 100-دەن استام اقشا اۋدارىمى جاسالسا، وندا سالىق كولەمى 10 % بولىپ شىعا كەلەدى. ونىڭ ۇستىنە بۇل زاڭبۇزۋشىلىق ەكەنى دالەلدەنسە، بارلىق جاسىرىن تابىستىڭ 30 پايىزىن ايىپپۇل رەتىندە مەملەكەتكە تولەۋگە تۋرا كەلەدى.
بۇل ارادا تاعى مىنانداي جاعداي بار: ءۇش ايدا قاتارىنان ءبىر شوتقا تۇسكەن اقشا اۋدارىمى 100-دەن اسسا بانك اۆتوماتتى تۇردە سالىق ورگانىنا حابار بەرەدى. دەمەك، بارلىق ادامنىڭ اقشا اۋدارىمى باقىلاۋعا جاتپايدى. بۇل – بىرىنشىدەن. ەكىنشىدەن، ماسەلەن ءبىرىنشى ايدا 100 رەت اقشا اۋدارىمى، ەكىنشى ايدا 95 رەت اقشا اۋدارىمى، ءۇشىنشى ايدا 93 رەت اقشا اۋدارىمى جاسالسا، وندا بۇل مالىمەت سالىق ورگانىنا بارىپ تۇسپەيدى.
پىكىر قالدىرۋ