«گازادا ءجۇرىپ جاتقان سوعىس «ونداعان جىلدارعا سوزىلىپ كەلە جاتقان،  پالەستينالىقتاردى باسىپ-جانشۋداعى يزرايل ەزگىسىنىڭ كورىنىسى» دەپ Euronews قحر ءسىم وكىلى ما ءسينميننىڭ ءسوزىن كەلتىرەدى.

پالەستينالىقتاردىڭ تاۋەلسىز مەملەكەت قۇرۋعا ۇمتىلىسى، نەگىزىنەن زاڭدى قۇقىقتارىن، ءوزىن-وزى تانۋ قۇقىعىن قالپىنا كەلتىرۋ بولىپ تابىلادى. پرەزيدەنت مىرزا، سوت تورەلىگى شەشىم شىعارۋدا اسىعار ەمەس، ءبىراق ءبىر بايلامعا كەلۋ كەرەك. پالەستينا ماسەلەسىن شەشۋ ءۇشىن پالەستينا مەن ءيزرايلدىڭ ءوزارا كۇش-جىگەرى قاجەت"، - دەدى ما سينمين.

ءوز كەزەگىندە يران وكىلى: "يزرايل رەجيمى ەش قىمسىنباستان گازا سەكتورىندا قىلمىستىق ارەكەتتەرگە ءالى بارۋدا» دەي كەلىپ، بۇۇ سوتى شەشىم قابىلداۋدا اتالعان جاعدايعا ىقپال ەتە الادى دەگەن ءۇمىتىن ءبىلدىردى.

ەۋروپا ەلدەرى مەن بۇۇ ءسىم باسشىلارى گۋمانيتارلىق داعدارىستىڭ شيەلەنىسۋىنە بايلانىستى گازا سەكتورىنداعى اتىس-شابىستى دوعارۋعا شاقىردى.

الايدا يزرايل اسكەرىنىڭ باس قولباسشىسى بەني گانستىڭ ءسوزى قاراما-قايشى جاعدايدى سيپاتتايدى.

«ەگەر حاماس 7 قازاننان باستاپ ۇستالعان 130-عا جۋىق كەپىلگە الىنعان ادامدى بوساتپاسا، مۇسىلماندار ءۇشىن قاسيەتتى رامازان ايىنىڭ باسىندا رافاقتا قۇرلىق شابۋىلىن باستايمىز» دەپ ول دوق كورسەتتى.

ال رافاق - اسكەري شابۋىلدارداردان باس ساۋعالاعان 2،3 ميلليون گازا حالقىنىڭ تەڭ جارتىسى پانالاعان قالا.

يزرايل بيلىگى اسكەري ءىس-قيمىل الدىندا قالانىڭ بەيبىت تۇرعىندارىن ەۆاكۋاسيالايتىنىن مالىمدەدى. ءبىراق قايدا؟ وسى سۇراق حالىقارالىق قاۋىمداستىقتى مازالايدى. سەبەبى گازا سەكتورىندا امان قالعان تىنىش اۋماق جوق. سوندىقتان بەيبىت تۇرعىندار اراسىندا قۇربانداردىڭ سانى ارتۋى ىقتيمال دەگەن بولجام دا بار. پالەستينا بيلىگىنىڭ مالىمەتى بويىنشا، اتىس-شابىس باستالعالى 29 400-دەن استام ادام وپات بولعان.