قورعانىس مينيسترلىگى قارۋلى كۇشتەردىڭ جاۋىنگەرلىك دايىندىق باعدارلاماسى شەڭبەرىندە 11-19 ناۋرىز ارالىعىندا قاراعاندى وبلىسىنىڭ اۋماعىندا ەكى جاقتى كوماندالىق-شتابتىق وقۋ-جاتتىعۋ وتەتىنىن مالىمدەدى.
جاۋىنگەرلىك دايىندىق ءىس-شارالارى كەزىندە قاراعاندى، الماتى، جەتىسۋ وبلىستارىنىڭ اۋماعىندا كۇشتەر مەن قۇرالدار قوزعالىسى جۇزەگە اسپاق.
مينيسترلىك مالىمەتىنشە، وقۋ-جاۋىنگەرلىك مىندەتتەردى پىسىقتاۋ ماقساتىندا بولىمشەلەر پوليگوندارعا تەمىر جول، اۋە جانە اۆتوموبيل كولىگى ارقىلى ارالاس تاسىلمەن مارش جاساپ، كەيىن تۇراقتى ورنالاسۋ پۋنكتتەرىنە ورالادى.
قورعانىس مينيسترلىگى اتالعان كەزەڭدە ءوڭىردىڭ جەكەلەگەن اۋداندارىندا شەكتەۋ شارالارى ەنگىزىلۋى مۇمكىن ەكەنىن حابارلاپ، جۇرتشىلىقتى تەك رەسمي اقپاراتقا سەنۋدى شاقىردى.
"وسىعان بايلانىستى ازاماتتاردان ءوتىپ جاتقان وقۋ-جاتتىعۋلارعا تۇسىنىستىكپەن قاراۋدى جانە تىنىشتىق ساقتاۋدى سۇرايمىز. سونىمەن قاتار الەۋمەتتىك جەلىلەردى پايدالانۋشىلاردان اسكەري تەحنيكانىڭ قوزعالىسى تۋرالى جالعان حابارلامالار مەن بەينەماتەريالدار تاراتپاۋدى جانە تەك رەسمي اقپارات كوزدەرىنە سەنۋدى سۇرايمىز. ەستەرىڭىزگە سالا كەتەيىك، قولدانىستاعى زاڭنامادا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعان" دەلىنگەن مينيسترلىك حابارلاماسىندا.
پىكىر قالدىرۋ