سوت ماتەريالدارىنا سايكەس، كوماندير جاس ساربازداردى قاتارعا تۇرعىزىپ، فاميلياسىن بىلە مە دەگەن سىلتاۋمەن ولاردىڭ ءبىرىنىڭ باسىنان اعاش دۋبينكامەن ۇرعان. الايدا سارباز كومانديردىڭ فاميلياسىن دۇرىس ايتپاعاندىقتان تاعى دا بىرنەشە رەت سوققى العان. تۋرا وسىنداي سوققىنى تاعى بىرنەشە سارباز العان.
تاعى ءبىر ەپيزود بويىنشا كوماندير جاساقتاۋعا كەشىگىپ كەلگەن ساربازدى بەتىنەن جۇدىرىقپەن ۇرعانى انىقتالعان. كەيىنىرەك ول قاتارداعى جاۋىنگەر جاتتىعۋ كەزىندە بالاعات سوزدەر ايتتى دەپ ونىڭ باسىنان ورىندىقپەن بىرنەشە رەت ۇرعان. قاتتى سوققىدان سوڭ جاۋىنگەر باسىن ۇستاپ، قورعانباق بولعاندا كوماندير ونى تەپكىلەپ، جۇدىرىقتاي جونەلگەن. بۇدان وزگە ەپيزودتا اسكەري قىزمەتشى پوليگوندا تاعى ءبىر ساربازدى جۇدىرىقپەن ۇرىپ، ءتىسىنىڭ ءبىر بولىگىن سىندىرعانى ايتىلادى.
تەرگەۋ كەزىندە جابىرلەنۋشى دەپ تانىلعان 5 سارباز قىزمەتتىك وكىلەتتىگىن اسىرا پايدالاندى دەپ ايىپتالعان كومانديرگە كەشىرىم بەرىپ، تاراپتاردىڭ تاتۋلاسۋى تۋرالى ارىز جازعان. سوتتا ايىپتالۋشى ءوز كىناسىن مويىندايتىنىن جانە جابىرلەنۋشىلەرمەن تاتۋلاسۋعا كەلىسەتىنىن ايتقان.
اقتوبە گارنيزونىنىڭ اسكەري سوتى تاراپتاردىڭ تاتۋلاسۋىنا بايلانىستى قىلمىستىق ءىستى قىسقارتتى.
سوت قاۋلىسى ءالى زاڭدى كۇشىنە ەنگەن جوق.
پىكىر قالدىرۋ