اقتاۋلىق باپكەر ەلمان اگايەۆ Nomad MMA جەكپە-جەگى كەزىندە قازا تاپقان سپورتشى ءومىرىنىڭ سوڭعى مينۋتتارى تۋرالى ايتىپ بەردى. تاياۋدا "كانۆاستا" قايتىس بولعان 17 جاستاعى قانات احۋنوۆ (02.04.2024) باپكەرى ەلمان اگايەۆتىڭ باسشىلىعىمەن شامامەن ءۇش اي بويى سپورتزالدا جاتتىعۋ جاساعان.

جاتتىقتىرۋشىسى وسى ۋاقىت ىشىندە مارقۇمنىڭ دەنساۋلىعىنا بايلانىستى شاعىمدانعانىن ەستىمەگەنىن ايتتى.

"قانات كيكبوكسينگتەن الەم چەمپيونى بولدى. سوندىقتان مەن ونى تاجىريبەلى سپورتشى رەتىندە تاڭدادىم. بۇعان دەيىن ول ءبىر جىلعا جۋىق جاتتىعۋدان ءۇزىلىس العان. جارىس الدىندا مەديسينالىق تەكسەرۋدەن وتكەنى تۋرالى انىقتاما الىپ كەلدى. بۇل – جارىسقا قاتىسۋدىڭ مىندەتتى شارتى. العاشقى جەكپە-جەكتى 20 سەكۋندقا ەرتە اياقتادى. ەكىنشى جەكپە-جەك تە جاقسى باستالعان ەدى. الايدا ورتاسىندا بىرنارسە دۇرىس ەمەس ەكەنىن بايقادىم. وعان جاقىنداعان كەزدە ول جۇرەگى اينىعانىن ايتىپ شاعىمداندى. وعان سۋ قۇيىپ بەردىم. بۇدان كەيىن ول سۋ ءىشىپ الىپ، بىرنەشە رەت دەم الدى. دەم شىعارىپ، قايتادان ۇرىسقا شىقتى. 20 سەكۋندتان كەيىن ول ءوزىن ناشار سەزىنىپ، جەرگە قۇلاي باستادى. ءقازىر بارلىعى وعان سوققى بەرگەن قارسىلاس كىنالى دەپ ايتادى، ءبىراق ولاي ەمەس. قانات سوققىعا دەيىن قۇلاي باستادى، – دەدى ەلمان اگايەۆ.

دارىگەرلەر كەلگەنگە دەيىن جاس جىگىتتىڭ جۇرەگى توقتاپ قالعان. سوت-مەديسينالىق ساراپتاما تاعايىندالىپ، قك 104-بابىنىڭ 1-بولىگى بويىنشا سوتقا دەيىنگى تەرگەۋ باستالدى ("ابايسىزدا ءولىم كەلتىرۋ").

ەلمان اگايەۆ قانات سول كەزدە ورازا ۇستاعانىن ايتتى. ول مۇنى قايتىس بولعاننان كەيىن عانا بىلگەن. جاتتىقتىرۋشى ەگەر ول بۇل تۋرالى ەرتەرەك حاباردار بولسا، جارىسقا دەيىن جاس جىگىتتى جىبەرمەيتىنىن اتاپ ءوتتى.

ەسكە سالايىق، 31 ناۋرىزدا اقتاۋدا جاسوسپىرىمدەر اراسىنداعى جارىس كەزىندە پوليتەحنيكالىق كوللەدجدىڭ 3-كۋرس ستۋدەنتى اۋىر سوققىدان كوز جۇمعان.