ءماجىلىس دەپۋتاتى اسحات ايماعامبەتوۆ "Qasqa jol" YouTube ارناسىنا بەرگەن سۇحباتىندا قازاقتاندا تۇرمىستىق زورلىق-زومبىلىققا قارسى قابىلدانعان زاڭدارعا قاتىستى پىكىر ءبىلدىردى. 
ونىڭ ايتۋىنشا، قوعامدا بۇل زاڭ اياسىندا بىلمەستىكپەن جانە ادەيى دە تاراتىلعان ميفتەر مەن فەيك اقپارات كوپ. ءماجىلىس دەپۋتاتى سۇحباتتا ونىڭ باستى ۇشەۋىنە توقتالدى. 
ءبىرىنشى ميف – زاڭ ەكس-مينيستر قۋاندىق بيشىمبايەۆتىڭ ىسىنەن كەيىن عانا قابىلداندى
الايدا، اسحات ايماعامبەتوۆتىڭ ايتۋىنشا، زاڭ جوباسى بۇل ىسكە دەيىن ازىرلەنىپ، اتالعان وقيعاعا دەيىن-اق، ۇكىمەتتىڭ قاراۋىنا ۇسىنىلىپ قويىلعان. "بۇل ماسەلە ءبىزدىڭ سايلاۋالدى باعدارلامامىزدا دا ايتىلعان بولاتىن"، – دەدى ول. 
ەكىنشى ميف – زاڭ تەك ايەلدەردىڭ قۇقىعىن قورعايدى
ءماجىلىس دەپۋتاتى بۇل اقپاراتتىڭ دا شىندىققا جاناسپايتىنىن ايتتى. 

"بۇل زاڭ ەرلەردىڭ دە، جالپى قازاقستان ازاماتتارىنىڭ قۇقىعىن قورعايدى. ەر ادامدى ەر ادامدى نە ايەل ادام ايەل ادامدى ۇرىپ-سوقسا دا، ءدال وسى زاڭنىڭ نورمالارى قولدانىلادى"، – دەدى اسحات ايماعامبەتوۆ. 

ءۇشىنشى ميف – زاڭدا اتا-انادان بالانى تارتىپ الىپ قويۋعا رۇقسات بەرەتىن نورما بار
ءماجىلىس دەپۋتاتى، مۇنىڭ جالعان ەكەنىن ايتتى. 

"بۇل زاڭ كەرىسىنشە وتباسى ينستيتۋتىن كۇشەيۋ باعىتىندا جۇمىس ىستەيدى. ءبىز زاڭعا ءداستۇرلى وتباسى قۇندىلىقتارىن دارىپتەيتىن پرينسيپتەردى ەنگىزدىك. وعان سايكەس، وتباسىن قولداۋ ورتالىقتارى جۇمىس ىستەيدى. ياعني، ەگەر وتباسىندا قانداي دا ءبىر الەۋمەتتىك ماسەلەلەر بارى انىقتالسا، وعان الدىن الا كومەك بەرىلەدى"، – دەپ ءتۇسىندىردى اسحات ايماعامبەتوۆ. 

ونىڭ سوزىنشە، كوپ ادام مۇنداي جالعان اقپاراتقا بىلمەستىكپەن سەنىپ جانە ونى تاراتىپ جاتسا، بەلگىلى ءبىر ادامدار نە توپتاردىڭ مۇددەسى اياسىندا ارنايى قاۋەسەت تاراتۋمەن شۇعىلداناتىندار بارىن دا ەسكەرتتى. 

"زاڭدى الىپ وقۋ كەرەك. ءبارىمىز وقۋ بىلەمىز. زاڭدى وقيتىن بولسا، وندا ەشقانداي دا اقىلعا سىيمايتىن زاڭ نورمالارى جوق ەكەنىنە كوز جەتكىزەمىز"، – دەدى ءماجىلىس دەپۋتاتى.