بۇعان قاتىستى بىلتىر 14 قاراشا كۇنى مەملەكەت باسشىسى  قاسىم-جومارت توقايەۆ قازاقستاندىقتاردى حالىق سانىنىڭ 20 ميلليونعا جەتۋىمەن قۇتتىقتاعان ەدى. ول قۇتتىقتاۋىندا «حالقىمىزدىڭ سانى جيىرما ميلليونعا جەتتى! بارشاڭىزدى اقجولتاي جاڭالىقپەن قۇتتىقتايمىن! باقىتتى وتباسى – باقۋاتتى ەلدىڭ نەگىزى. مەملەكەت وتباسى قۇندىلىقتارىن نىعايتۋ مەن قاتار انا مەن بالانى قورعاۋعا باسا ءمان بەرەدى»، - دەپ جازعان بولاتىن.

وسى ورايدا، بىلتىر عانا ەلىمىزدە حالىق سانى 20 ميلليونعا جەتكەن بولاتىن. ۇلتتىق ستاتيستيكا بيۋروسىنىڭ مالىمەتى بويىنشا،  سوڭعى 30 جىلدا حالىق سانى 22،3 پايىزعا وسكەن. سونىڭ ىشىندە الماتى وبلىسىنىڭ دەموگرافيالىق ءوسىم كورسەتكىشى دە ءبىرشاما جوعارىلاعان. ياعني، حالىقتىڭ الەۋمەتتىك جاعدايىنىڭ دۇرىستالۋىمەن بىرگە تۋۋ كورسەتكىشى دە جىلدان جىلعا جاقسارىپ كەلەدى. بۇل قۋانتارلىق جاعداي، ارينە.

دەموگراف شىنار پازىلبەك قىزى الماتى وبلىسى بولىنگەننەن كەيىنگى  ۋاقىت ارالىعىندا تۋۋ دەڭگەيى ءبىر ايەلگە ورتا ەسەپپەن 3،57  بالادان كەلەتىنىن ايتادى.

- الماتى وبلىسى بولىنگەنگە دەيىن دە دەموگرافيالىق ءوسىمى بار ءوڭىر بولىپ تابىلادى. 2022 جىلعا دەيىن وڭىردەگى حالىق سانى جىلىنا 1-2 پايىز شاماسىنا ءوسىپ، 2 ميللوننان استى. 2022 جىلى وبلىس بولىنگەننەن كەيىنگى  ۋاقىت ارالىعىندا دا وڭىردەگى حالىق سانى 3،6 پايىزعا ءوستى. وبلىس حالقىنىڭ تەز وسۋىنە ءوڭىردىڭ الماتى قالاسىنا جاقىن ورنالاسۋى ىقپال ەتەدى. حالىقتىڭ وبلىس اۋماعىندا تۇرىپ، قالادا جۇمىس ىستەۋ تەندەنسياسى قالىپتاسىپ، ءوسىپ كەلەدى. الماتى وبلىسىنىڭ حالقى جاس، 2024 جىلدىڭ باسىنداعى ستاتيستيكا بويىنشا 65 جاس جانە ودان جوعارى جاستاعى حالىقتىڭ ۇلەسى 7، 7 پايىزدى قۇرادى، بۇل جالپى رەسپۋبليكالىق دەڭگەيدەن (8،8 پايىز) تومەن. حالىقتىڭ تابيعي ءوسىم دەڭگەيى دە جوعارى. تۋۋ دەڭگەيى ءبىر ايەلگە ورتا ەسەپپەن 3،57  بالادان كەلەدى. حالىقتىڭ ءومىر ءسۇرۋ ۇزاقتىعى 2023 جىلى 74،53 جىلدى قۇرادى. بۇل رەسپۋبليكالىق دەڭگەيدەن ءسال عانا تومەن. قورىتىندىلاي كەلە، ايتاتىنىمىز، الماتى وبلىسىنىڭ ەلىمىزدىڭ  ءىرى مەگاپوليسىنىڭ جانىندا ءساتتى ورنالاسۋى ءوڭىردىڭ دەموگرافيالىق جاعدايىنىڭ وڭتايلى بولىپ تۇرۋىنا ىقپال ەتەدى.

دەموگراف ايتپاقشى،  الماتى ەلىمىزدىڭ ءىرى مەگاپوليسىنىڭ جانىندا ورنالاسۋى سەبەبىنەن دە مۇندا حالىق سالىنا جىلدان جىلعا ارتىپ كەلەدى. حالىق سانىنىنىڭ وسۋىنە وراي، جاستاردى جۇمىسپەن قامتۋدان بولەك تۇرعىن ۇيلەرمەن قامتاماسىز ەتۋ، ءۇش اۋىسىمدىق مەكتەپتەردى جويۋ، دەنساۋلىق ساقتاۋ سالاسىن دامىتۋ سەكىلدى جۇمىستار دا قاتار اتقارىلۋدا. سونداي-اق ەڭبەكككە قابىلەتتى حالىق سانى جاعىنان دا قازاقستانعا ۇلەسىن قوسىپ جاتقاندىعىن دا بايقايمىز. بۇعان قاتىستى ەڭبەك جانە حالىقتى الەۋمەتتىك قورعاۋ ۆيسە-مينيسترى ەربول وسپانوۆ: ۇزاق مەرزىمدى دەموگرافيالىق بولجامعا سايكەس، 2030 جىلعا قاراي ەڭبەككە قابىلەتتى جاستان اسقان حالىق سانى 25 پايىزعا، ال 2050 جىلعا قاراي 1،7 ەسە وسەدى. ەڭبەككە قابىلەتتى جاسقا دەيىنگى حالىق سانى 2030 جىلعا قاراي نە ءبارى 2%-عا، ەڭبەككە قابىلەتتى جاستاعى - 11% -عا وسەدى، بۇل رەتتە 2050 جىلعا قاراي ءوسىم تيىسىنشە 41% جانە 36% قۇرايتىنىن مالىمدەگەن-دى. سونىڭ ىشىندە الماتى وبلىسى 2050 جىلعا قاراي دەموگرافيالىق جۇكتەمە كوەففيسيەنتىجوعارىلايتىنىنا كۇمان جوق.