الماتى وبلىسىنىڭ اكىمى مارات سۇلتانعازييەۆ جۇڭگو حالىق رەسپۋبليكاسىنىڭ باس كونسۋلى سزيان ۆەي حانىممەن كەزدەسىپ، وبلىس پەن جۇڭگو اراسىنداعى ساۋدا قاتىناستارىن كەڭەيتۋ ماسەلەسىن تالقىلادى. بۇل تۋرالى وبلىس اكىمىنىڭ باسپا ءسوز قىزمەتى حابارلادى. 

مارات سۇلتانعازييەۆ ءوز سوزىندە «كولجات» جانە «نارىنكول» وتكىزۋ بەكەتتەرىن دامىتۋ ەكى ەل اراسىنداعى تاۋار اينالىمىن نىعايتىپ، ارتتىرۋعا زور ۇلەس قوساتىنىن اتاپ ءوتتى.

جالپى، قحر قازاقستاننىڭ الەمدىك ەكونوميكالىق دەرجاۆاداعى تىكەلەي سەرىكتەسى. قىتايلىق ينۆەستورلاردىڭ ىقپالداسۋىمەن ءبىرشاما جوبالار جۇزەگە اسقانى ءمالىم. ونىڭ ىشىندە الماتى وبلىسىندا دا ءبىرقاتار جۇمىستار اتقارىلعان ەدى. اتاپ ايتساق، «Kelun-Kazpharm» ج ش س فارماسيەۆتيكالىق زاۋىتىنىڭ ءوندىرىسى ىسكە قوسىلدى، «ەنەرگيا سەميرەچيا» ج ش س جاڭارتىلاتىن ەنەرگيا كوزدەرىن ءوندىرۋ جوباسى جۇزەگە اسىرىلدى، اۋىل شارۋاشىلىعى سالاسىن دامىتۋ اياسىندا «جىبەك جولى» ج ش س تامشىلاتىپ سۋارۋ جۇيەسىنە ارنالعان جيىنتىقتاۋىشتار، مالعا ارنالعان ازىق-تۇلىك قوسپالارىن ءوندىرۋ ءۇشىن ءداندى داقىلداردى قايتا وڭدەۋ ءوندىرىسى جولعا قويىلعان ەدى. 

ايماق باسشىسى مارات ەلەۋسىز ۇلىنىڭ ايتۋىنشا، بۇل جوبالار ەكى تاراپتىڭ ەكونوميكالىق دامۋ ماسەلەلەرىندەگى تابىستى ءوزارا ءىس-قيمىلىن كورسەتەدى.

«قىتايدان كەلگەن ينۆەستورلارمەن ءوزارا ءىس-قيمىل وبلىستىڭ ەكونوميكالىق دامۋى ءۇشىن ماڭىزدى بولىپ شىقتى. مۇنداي ينۆەستيسيالار كوبىنەسە جۇمىس كۇشىنىڭ بىلىكتىلىگىن ارتتىراتىن جانە جالپى سالانىڭ دامۋىنا ىقپال ەتەتىن تەحنولوگيالار مەن ءبىلىم ترانسفەرتىن قامتيدى. قىتايمەن ىنتىماقتاستىقتىڭ وڭ تاجىريبەسى جاڭا ينۆەستيسيالار تارتۋعا جانە ءوڭىر ەكونوميكاسىنىڭ باسقا دا سەكتورلارىن دامىتۋعا ۇلگى بولا الادى»، - دەدى مارات سۇلتانعازييەۆ.

قازىرگى ۋاقىتتا جۇڭگو حالىق رەسپۋبليكاسىنىڭ قاتىسۋىمەن 11 پەرسپەكتيۆالىق جوبانى جۇزەگە اسىرۋ قاراستىرىلۋدا، ولاردىڭ ىشىندە ەڭ ىرىلەرىنىڭ قاتارىندا «تۆەا» كومپانياسىنىڭ ترانسفورماتور زاۋىتىنىڭ قۇرىلىسى، سۋارۋ جۇيەلەرىن ءوندىرۋدى ىسكە قوسۋ جانە «Yulin irrigation» كومپانياسىنىڭ تراكتورلار مەن اۋىل شارۋاشىلىعى تەحنيكاسىن قۇراستىرۋ زاۋىتىن سالۋ دا بار. 

بۇگىندە وڭىردە جۇڭگو حالىق رەسپۋبليكاسىنىڭ كاسىپكەرلەرىمەن بىرلەسىپ جالپى سوماسى 268 ملرد تەڭگەدەن استام 10 جوبا جۇزەگە اسىرىلۋدا.

ەسكە سالامىز، الماتى وبلىسى ينۆەستيسيالىق جوبالارعا باي ءوڭىر. بيىلعى جىلدىڭ مامىر ايىندا الماتى وبلىسىنىڭ ينۆەستيسيالىق قورجىنىندا جالپى سوماسى 3،4 ترلن تەڭگەگە جەتتى.