دەپۋتات ەرلان سايروۆ كارىم ءماسىموۆتىڭ اكتيۆتەرىن قايتارۋ باعىتىندا جۇمىستاردىڭ جۇرگىزىلىپ جاتقانىن ايتتى. 

"وتانعا وپازدىق" بابى بويىنشا قىلمىسقا ەشقانداي كەشىرىم بەرۋگە بولمايدى. ماسەلەن، ەگەر ونداي ادامعا بۇگىن راقىمشىلىق بەرسەك، ەرتەڭگى كۇنى قازاقستان مەملەكەتىنە قارسى جۇمىس ىستەمەسىنە كىم كەپىل؟ كارىم ءماسىموۆتىڭ قارجىسى ءالى قايتارىلعان جوق. ونىڭ ميللياردتاعان دوللارى شەتەلدە جاتىر. سوندىقتان بۇل ءىستى ءجىتى قاراپ، مەملەكەتتىڭ مۇددەسى تاراپىنان شەشىم قابىلدانۋى كەرەك، – دەدى ەرلان سايروۆ.

تاعى ءبىر ءماجىلىس دەپۋتاتى ەدىل ءجاڭبىرشيننىڭ ايتۋىنشا، مەملەكەتكە وپاسىزدىق جاساعان ادامعا راقىمشىلىق بەرىلمەيدى.

مەملەكەتكە قاستاندىق جاساپ، ونىڭ ۇستىنە 230-دان كوپ ادامنىڭ ولىمىنە كىنالى بولعان ادامدى قانشا جىل وتسە دە بوستاندىققا شىعارماۋ كەرەك دەپ ويلايمىن. ول مەملەكەتكە قاستاندىق جاساپ، بىت-شىت قىلىپ جىبەرە جازدادى. ءبىز قازاقستانىمىزدى جوعالتىپ الا جازدادىق. سيريا سەكىلدى جاعدايعا دۋشار بولۋدىڭ الدىندا قالدىق. سوندىقتان مۇنداي ادامدارعا ەشقانداي راقىمشىلىق بولماۋعا ءتيىس، – دەپ جاۋاپ بەردى دەپۋتات ءماجىلىس كۋلۋارىندا.

بۇعان دەيىن حابارلاعانىمىزداي، مەملەكەتكە وپاسىزدىق جاساعانى جانە بيلىكتى باسىپ الۋعا تىرىسقانى ءۇشىن سوتتالعان ۇقك-نىڭ بۇرىنعى باسشىسى كارىم ءماسىموۆ بيىلعى جىلدىڭ ناۋرىز ايىندا راقىمشىلىق جاساۋ تۋرالى ءوتىنىش بەرگەن.