پوليسيا قىزمەتكەرىنىڭ زاڭدى تالاپتارىن ورىنداماعان نەمەسە كەدەرگى كەلتىرگەن جۇرگىزۋشى جاۋاپقا تارتىلادى، دەپ حابارلايدى ىشكى ىستەر مينيسترلىگى.
مينيسترلىك جۇرگىزۋشىلەرگە ۇندەۋ جاسادى. بۇعان سوڭعى كەزدەرى ب ا ق پەن الەۋمەتتىك جەلىلەردە پوليسيا قىزمەتكەرلەرىنەن جەدەل-پروفيلاكتيكالىق ءىس-شارالاردىڭ وتكىزىلۋى تۋرالى قۇجاتتاردى تالاپ ەتىپ، ولاردىڭ جۇمىسىنا كەدەرگى كەلتىرگەنى تۋرالى بەينەجازبالار سەبەپ بولعان.
"كولىكتى توقتاتۋ كەزىندە پوليسيا قىزمەتكەرى ءوزىن تانىستىرىپ، قىزمەتتىك كۋالىگىن كورسەتىپ، توقتاتۋ سەبەبىن ءتۇسىندىرۋى قاجەت. جۇرگىزۋشى ءوز كەزەگىندە ىشكى ىستەر ورگاندارى قىزمەتكەرىنىڭ زاڭدى تالاپتارىن ورىنداۋعا مىندەتتى. ال پوليسيا قىزمەتكەرى جەدەل-پروفيلاكتيكالىق ءىس-شارانىڭ وتكىزىلىپ جاتقانىن راستايتىن قۇجاتتاردى كورسەتۋگە مىندەتتى ەمەس"، - دەيدى ۆەدومستۆو.
مينيسترلىك "جول ءجۇرىسى تۋرالى" زاڭدا كولىكتەردى توقتاتۋ كەزىندە پوليسيا قىزمەتكەرلەرى مەن جۇرگىزۋشىلەردىڭ ءىس-قيمىلىنىڭ ناقتى ءتارتىبى ايقىندالعانىن ايتادى.
"پوليسيا قىزمەتكەرىنىڭ زاڭدى تالاپتارىن ورىنداماۋ، قىزمەتتىك مىندەتتەرىن اتقارۋ كەزىندە ونىڭ جۇمىسىنا كەدەرگى كەلتىرۋ 30 ايلىق ەسەپتىك كورسەتكىش مولشەرىندە ايىپپۇل سالۋ نەمەسە 15 تاۋلىككە دەيىن قاماۋعا الۋ تۇرىندەگى اكىمشىلىك جاۋاپقا اكەپ سوعادى"، – دەدى ق ر ءىىم اكىمشىلىك پوليسيا كوميتەتىنىڭ ءتوراعاسى قايسار سۇلتانبايەۆ.
