جەرگىلىكتى تۇرعىندار قوعامدىق دارەتحانانىڭ قۇرىلىسى بىتسە دە نە سەبەپتى قولدانىسقا بەرىلمەگەنىن تۇسىنبەي دال. ايتۋلارىنشا، 22 ميلليون تەڭگەگە سالىنعان نىساندا جۇمىسشىلار ءجۇر، ءبىراق دارەتحانانىڭ ءوزى جۇمىس ىستەمەيدى.
مۇنداعىلار دارەتحانانىڭ ىشىندە جاسالعان جاعدايعا قاراپ ونىڭ باعاسىن قالاداعى جايلى پاتەردىڭ قۇنىمەن تەڭەستىردى.
“تۋريستەر مەن تاسىمالداۋشىلارعا ىڭعايلى بولۋ ءۇشىن ەكى مودۋلدىك قوندىرعى ورناتتىق. مۇمكىندىگى شەكتەۋلى جاندارعا جاعداي جاسالدى. انتيۆاندالدى دارەتحانالار مەن راكوۆينالار، بەينەباقىلاۋ كامەرالارى، كونديسيونەر ورناتىپ، سۋمەن، جىلۋمەن قامتاماسىز ەتىلدى. ءبىراق مۇنىڭ ءبارى ىسكە قوسىلعان جوق”، – دەيدى شەندىلەر.
اباي اۋداندىق جولاۋشىلار كولىگى جانە اۆتوموبيل جولدارى باسقارماسىنىڭ باسپا ءسوز حاتشىسى اسەم نۇرلان قىزىنىڭ ايتۋىنشا، مودۋلدىك نىسان قوسىمشا دايىندىق جۇمىستارىنا بايلانىستى ۋاقىتشا جۇمىس ىستەمەيدى. دارەتحانالار ىسكە قوسىلعانعا دەيىن نىساندى مەردىگەر كۇزەتەدى.
پىكىر قالدىرۋ