2024 جىلعى شىلدە ايىندا ايلىق ينفلياسيا دەڭگەيى 0،7% قۇرادى. ماۋسىم ايىندا بۇل كورسەتكىش 0،4% بولاعان ەدى. ءبىر ايدا ەلىمىزدەگى اقىلى قىزمەتتەردىڭ باعاسى 1،6%، ازىق-تۇلىككە جاتپايتىن تاۋارلار 0،7%، ازىق-تۇلىك تاۋارلارى 0،2% وسكەن. بۇل تۋرالى ۇلتتىق ستاتيستيكا بيۋروسى مالىمدەدى. 

شىلدەدە ۇيالى بايلانىس باعاسى 11،5%، ينتەرنەت-بايلانىس قىزمەتى 6،8%-عا ءوستى. اۋە كولىگىنىڭ قىزمەتى 12،9%، كەشەندى دەمالىستى ۇيىمداستىرۋ قىزمەتى 11،5%-عا قىمباتتادى.

ال باللوندارداعى سۇيىتىلعان گاز باعاسى 5،3% ءوستى. ىدىس-اياق 1%، كيىم مەن اياق كيىم 0،8% قىمباتتادى. دارى-دارمەكتەر باعاسى 0،6% ءوستى.

ازىق-تۇلىكتەن قىرىققابات باعاسى 16،8%، كارتوپ – 7،5%، پياز – 7،3% ءوستى. تەمەكى ونىمدەرى – 3،8%، مينەرالدى سۋ 1،6% ءوستى. ارزانداعان تاۋارلاردان: قىزاناق باعاسى 18،2%، ءتاتتى بۇرىش – 11،2%، قىزىلشا – 6،3%، قيار – 5،8%، ءسابىز 2،1% ارزاندادى.

2024 جىلعى شىلدەگى ەسەپ بويىنشا جىلدىق ينفلياسيا دەڭگەيى 8،6% قۇرادى. اقىلى قىزمەتتەردىڭ باعاسى 14،5%، ازىق-تۇلىك ەمەس تاۋارلارىنىڭ باعاسى – 7،3%، ازىق-تۇلىك تاۋارلارىنىڭ باعاسى 5،5% ءوستى.

2023 جىلعى شىلدەسىمەن سالىستىرعاندا سۋ ءتاريفى 42،7%، سۋىق سۋعا – 36،5%، ورتالىق جىلىتۋعا – 33%، ەلەكتر ەنەرگياسىنا – 31%، ىستىق سۋعا – 29،6%، قوقىس شىعارۋعا 25،1% ءوستى. دەنساۋلىق ساقتاۋ قىزمەتتەرى 11،4%، بايلانىس قىزمەتتەرى 10،7% قىمباتتادى. اسەتيلساليسيل قىشقىلىنىڭ باعاسى 59،4%، بەلسەندىرىلگەن كومىرگە – 32،1%، حيلاك فورتەگە – 25،4%، پاراسەتامولعا 19،8% ءوستى. بانان – 29،9%، ءجۇزىم – 26،6%، قيار – 23،5%، ءزايتۇن مايى 20،2% قىمباتتادى. ال جىلدىق ماندە پياز باعاسى 34،8%، قاراقۇمىق جارماسى – 22،1%، كۇنباعىس مايى – 20،8%، قىرىققابات 19% ارزاندادى.