«ءبىز قولدى بولعان جەكە دەرەكتەردىڭ ءبىرىڭعاي ءتىزىلىمىن جاساۋدى جوسپارلاپ وتىرمىز. ءبىزدىڭ ەلدە وسىنداي فۋنكسيونال بولعانىن قالايمىز. ول فۋنكسيا بۇكىل الەمدە بولىپ جاتقان جەكە دەرەك ۇرلىقتارىن تىركەپ وتىرادى. وزدەرىڭىز بىلەسىزدەر، بۇدان قازاقستان ازاماتتارى عانا ەمەس، بۇكىل الەم ازاماتتارى زارداپ شەگىپ وتىر. ءبىز وسى ۇرلانعان دەرەكتەردىڭ ىشىنەن قازاقستاندىقتاردىڭ دەرەكتەرىن تاۋىپ، ءبىرىڭعاي بازادا ساقتايمىز. بىرىنشىدەن، بۇل ءوز ازاماتتارىمىزعا ونىڭ قۇقىعى بۇزىلعانىن جانە شاعىم تۇسىرۋگە حاقىلى ەكەنىن حابارلاۋ ءۇشىن كەرەك. ەكىنشىدەن، وسى دەرەكتەر بازاسى ارقىلى ءار ازاماتقا جەكە شىعىپ، الاياقتار حابارلاسقان جاعدايدا قالاي ارەكەت ەتۋ كەرەكتىگىن ۇيرەتەمىز. ۇشىنشىدەن، ەڭ باستىسى، ءبىز جەكە دەرەكتەر قولدى بولعان جاعدايدا ەلەكتروندى ۇكىمەت پورتالىندا "ستوپ كرەديت" فۋنكسياسىن اۆتوماتتى تۇردە قوساتىن وكىلەت العىمىز كەلەدى»، — دەدى ول.
رۋسلان ءابدىقالىقوۆ اتالعان فۋنكسيا بىلتىردان بەرى ەرىكتى تارتىپپەن جۇمىس ىستەپ تۇرعانىن ەسكە سالدى.
«ياعني، ازامات ەلەكتروندى ۇكىمەتتەن جەكە كابينەتىنە كىرىپ، وسى فۋنكسيانى قوسسا عانا الاياقتاردان ساقتايدى. ەندى جەكە دەرەگى قولدى بولعان ازاماتتاردىڭ سىرتىنان اۆتوماتتى تۇردە „ستوپ كرەديت“ فۋنكسياسىن قوسۋعا وكىلەت الۋىمىز كەرەك. ەگەر ازاماتقا كەيىن نەسيە الۋ كەرەك بولسا، eGOV-كە كىرىپ، ول فۋنكسيانى ەش كەدەرگىسىز الىپ تاستاي الادى. ءبىراق نەسيە راسىمدەپ بولعاننان كەيىن ول فۋنكسيانىڭ جالاۋشاسىن قايتا قوسقانى دۇرىس. ويتكەنى بۇل ءار ازاماتتىڭ قارجىلىق قاۋىپسىزدىگى ءۇشىن وتە ماڭىزدى»، — دەدى كوميتەت باسشىسى.
پىكىر قالدىرۋ