قونايەۆ قالاسىنىڭ اكىمى اسحات بەردىحانوۆ ءبولىم باسشىلارىمەن بىرگە شەڭگەلدى اۋىلدىق وكرۋگىن ارالاپ شىقتى. بۇل تۋرالى قونايەۆ قالاسىنىڭ اكىمدىگى حابارلادى. 

ەڭ الدىمەن ول اۋىلداعى كۇردەلى جوندەۋدى قاجەت ەتەتىن №2 سورعى ستانسياسىنىڭ جولىن كوردى. اۋىل شارۋاشىلىعى تەحنيكالارى ارى-بەرى ءجۇرىپ، اۆتوجول جارامسىز كۇيگە تۇسكەن. قالا اكىمى جولاۋشىلار كولىگى جانە اۆتوموبيل جولدارى ءبولىمىنىڭ باسشىسىنا جوبا جاساۋدى، ول دايىن بولعانشا ۋاقىتشا شەشىم تابۋدى تاپسىردى.

اسحات بەردىحانوۆ بارعان كەلەسى نىسان قوسقۇدىق اۋىلىنداعى ەسكى مەكتەپ عىماراتى بولدى. مۇندا بىلتىر جاڭا وقۋ وشاعى قولدانىسقا بەرىلگەن. ەندى بۇرىنعى مەكتەپتى شاعىن بالاباقشا جاساۋ كوزدەلىپ وتىر. ول ءۇشىن اجەتحانا، اسحانا، جاتىن ورىن دايىندالىپ قويعان. ءبىر عانا ماسەلە – ەدەنى توزىپ كەتكەن سپورت زالدى جوندەۋ. شاھار باسشىسى اۋىل اكىمى ماقسات جازييەۆكە مەكتەپ باسشىلىعىنا كومەكتەسىپ، پروبلەمانى جويۋدى تاپسىردى.

سونداي-اق اسحات بەردىحانوۆ ءبىلىم ورداسىنىڭ ەكىنشى عيماراتىن اۋىل تۇرعىندارىنىڭ يگىلىگىنە بەرۋ كەرەك ەكەنىن اتاپ ءوتتى.

«اۋىل حالقىمەن كەزدەسۋدە مادەني ورتالىقتىڭ قاجەتتىلىگى جايىندا سۇراق كوتەرىلدى. سول ءۇشىن عيماراتتى قولدانىسقا بەرەيىك. ءبىلىم بولىمىنەن قالا اكىمدىگىنىڭ اپپاراتىنا بالانسقا الايىق. شاشتاراز، تىگىن ورتالىعىن اشام دەيتىندەر بولسا، ولارعا دا كابينەت تاۋىپ بەرۋ كەرەك. جۇرتشىلىقتىڭ ءوزىن-وزى جۇمىسپەن قامتىعانى وتە دۇرىس»، – دەدى اكىم.

شاھار باسشىسى نازار اۋدارعان كەلەسى تۇيتكىل – اۋىل تازالىعى.

«تازا قازاقستان» ەكوناۋقانى ءوتىپ جاتىر. ال مەكتەپتىڭ ماڭايى رەتسىز دۇنيەگە تولىپ كەتكەن. اكسيا اياسىندا سەنبىلىك جاساپ، ەلدىمەكەندى قوقىستان تازارتۋ كەرەك»، – دەپ تاپسىرما بەردى اسحات بەردىحانوۆ.

سودان كەيىن اكىم اقوزەك اۋىلىنا باردى. مۇندا سەلدەن قورعايتىن ەكى كوپىردىڭ ىرگەسى وتىرىپ كەتكەن. جاعدايدى كورگەن اسحات بەردىحانوۆ كوپىردى جوندەۋدەن وتكىزگەن مەردىگەر كومپانيانى قايتا شاقىرتىپ، رەتكە كەلتىرۋدى تاپسىردى.