مەملەكەت باسشىسىنىڭ باسپا ءسوز حاتشىسى بەرىك ءۋاليدىڭ سوزىنشە،توقايەۆ ۇلتتىق قۇراما مۇشەلەرىمەن 15 تامىزدا كەزدەسۋدى جوسپارلاعان. 

“مەملەكەت باسشىسى 14 تامىزدا پاريج وليمپياداسىنىڭ جۇلدەگەرلەرى مەن باپكەرلەر قۇرامىن مەملەكەتتىك ناگرادالارمەن ماراپاتتاۋ تۋرالى جارلىققا قول قويدى. پرەزيدەنت ۇلتتىق قۇراما مۇشەلەرىمەن بۇگىن كەزدەسۋدى جوسپارلاعان ەدى. وكىنىشكە وراي، اتلەتتەر مەن جاتتىقتىرۋشىلاردىڭ جارتىسىنان كوروناۆيرۋس ينفەكسياسى انىقتالدى. سول سەبەپتى كەزدەسۋ كەيىنگە شەگەرىلدى. سپورتشىلار مەن باپكەرلەردىڭ تەزىرەك ساۋىعىپ كەتۋىنە تىلەكتەسپىز”، – دەدى بەرىك ءۋالي.

سونداي-اق ول مەملەكەت باسشىسى وليمپيادا جۇلدەگەرلەرىن مىندەتتى تۇردە قابىلدايتىنىن جەتكىزدى. كەزدەسۋ تامىز ايىنىڭ سوڭىنا جوسپارلانعان ەكەن. 

تۋريزم جانە سپورت مينيسترلىگى قانشا سپورتشىنىڭ كوروناۆيرۋس ينفەكسياسىن جۇقتىرعانىن حابارلادى.

"كوماندانىڭ ءۇش جۇلدەگەرى مەن ەكى جاتتىقتىرۋشىسىنان COVID-19 انىقتالدى. ولاردىڭ پتر تەستى وڭ ناتيجە بەردى. ولار ءقازىر وقشاۋلانعان"، – دەلىنگەن حابارلامادا.

مينيسترلىكتىڭ مالىمەتىنشە، سپورتشىلار ەم قابىلداپ جاتىر.

"اۋرۋ جەڭىل. ولاردىڭ تەزىرەك ساۋىعىپ كەتۋىن تىلەيمىز. كوماندانىڭ باسقا مۇشەلەرىنەن ۆيرۋس انىقتالعان جوق"، – دەدى مينيسترلىك. 

ايتا كەتەيىك، بۇعان دەيىن 14 تامىزدا مەملەكەت باسشىسى قاسىم-جومارت توقايەۆ پاريج وليمپياداسى جەڭىمپازدارى مەن باپكەرلەرىن ماراپاتتاعان ەدى.