اباي وبلىسىندا ەكى تەمىرجولشى ارنايى سحەما قۇرىپ، 2022 جىلدىڭ قاڭتارىنان ساۋىرىنە دەيىن 920 ميلليون تەڭگە تۇراتىن ديزەل وتىنىن ۇرلاپ كەلگەن. بۇل تۋرالى باس كولىك پروكۋراتۋراسى حابارلادى.
"سوتتا مەملەكەتتىك ايىپتاۋشى سوتتالعانداردىڭ جۇيەلى تۇردە قاتتى جەل تۇردى دەپ جالعان بايانداما جاساپ كەلگەنىن دالەلدەدى، لوكوموتيۆتەردى پايدالانۋ كەزىندە ديزەلدىك وتىن شىعىنىنىڭ ۇلعايۋ سەبەبىن ءتۇسىندىرۋ ءۇشىن ولار وسىلايشا 3 مىڭ توننادان استام جانارماي ۇرلاعان" – دەلىنگەن رەسمي مالىمدەمەدە.
سوت دەپو باستىعىن 8 جىلعا، ءماشينيستى 7 جىلعا سوتتادى. سونىمەن قاتار، ەكەۋى دە ماتەريالدىق جاۋاپتى قىزمەت اتقارۋ قۇقىعىنان ايىرىلدى. سونداي-اق، سوت ولارعا كەلتىرىلگەن شىعىندى وتەۋگە مىندەتتەدى.
پىكىر قالدىرۋ