الماتى اكىمى ەربولات دوسايەۆ جاڭا وقۋ جىلىنا دايىندىق جانە ستۋدەنتتەردى جاتاقحاناعا ورنالاستىرۋ ماسەلەسى بويىنشا جوعارى وقۋ ورىندارىنىڭ رەكتورلارىمەن كەزدەستى. 

"ەلىمىزدىڭ ماڭدايالدى وقۋ ورىندارىنىڭ دەنى الماتىدا ورنالاسقان، جىل سايىن مىڭداعان ستۋدەنت جوعارى ءبىلىم الۋ ءۇشىن وسىندا كەلەدى. ءبىزدىڭ مىندەتىمىز – ولارعا ساپالى ءبىلىم بەرۋ جانە جايلى جاتاقحانامەن قامتاماسىز ەتۋ"، - دەدى قالا اكىمى ەربولات دوسايەۆ. قالا اكىمى جاتاقحانا ماسەلەسى تىكەلەي باقىلاۋىندا ەكەنىن ايتىپ، الماتىعا وقۋعا كەلگەن ستۋدەنتتەردىڭ جاعدايىن جاساۋ بويىنشا قابىلدانىپ جاتقان شارالاردى تالقىلادى. سونىڭ ءبىرى – الماتىلىق ستۋدەنتتەردى جاتاقحاناعا ورنالاستىرۋ ماسەلەسىمەن اينالىساتىن ارنايى شتابتىڭ قۇرىلۋى. الماتى قالاسى اكىمدىگىنىڭ ستۋدەنتتەردى قولداۋعا ارنالعان تاعى ءبىر ماڭىزدى باستاماسى – داعدارىس جانە جەدەل دەن قويۋ جونىندەگى احۋالدىق ورتالىقتاردىڭ اشىلۋى. 

اكىمدىك وكىلدەرىنىڭ مالىمدەۋىنشە، داعدارىس ورتالىعى ALT ۋنيۆەرسيتەتىندە ورنالاسقان. داعدارىس ورتالىعىنىڭ مىندەتى – باسقا وڭىردەن كەلگەن باسپاناسىز ستۋدەنتتەرگە جەدەل قولداۋ كورسەتۋ جانە ۋاقىتشا ورنالاستىرۋ. داعدارىس ورتالىعىندا 70 ورىن بار. "احۋالدىق ورتالىق المالى اۋدانىنداعى جاستاردىڭ كوميۋنيتي ورتالىعىنىڭ بازاسىندا جۇمىس ىستەيدى. 1 تامىزدان باستاپ ورتالىق تاۋلىك بويى جۇمىس ىستەپ، ستۋدەنتتەرگە ورنالاستىرۋ ماسەلەسى بويىنشا جەدەل كومەك كورسەتىپ جاتىر. ورتالىق كۇن سايىن قازاقستاننىڭ تۇكپىر-تۇكپىرىنەن 1،5 مىڭنان استام قوڭىراۋ قابىلدايدى. سونىمەن قاتار قالانىڭ ءاربىر جوعارى وقۋ ورنىندا ستۋدەنتتەرگە تىكەلەي قولداۋ كورسەتەتىن احۋالدىق ورتالىقتار اشىلدى"، - دەلىنگەن ۆەدومستۆو حابارلاماسىندا. 

ايتا كەتەيىك، الماتىداعى 35 جوعارى وقۋ ورنىندا 199 مىڭنان استام ستۋدەنت ءبىلىم الىپ جاتىر، ونىڭ 124 مىڭى – وزگە وڭىردەن كەلگەن ستۋدەنتتەر. قالادا 109 ستۋدەنتتىك جاتاقحانا بار، وندا 36،2 مىڭنان استام ستۋدەنت تۇرادى. جالپى قاجەتتىلىك – 28،7 مىڭ ورىن. قالا اكىمىنىڭ قولداۋىمەن قابىلدانعان شارالاردىڭ ناتيجەسىندە تامىز ايىنىڭ سوڭىندا توسەك ورىن تاپشىلىعى 8،9 مىڭ ورىنعا دەيىن قىسقارعان. 

جاتاقحانا ماسەلەسى بويىنشا جەدەل دەن قويۋ جونىندەگى احۋالدىق ورتالىق – +77002551443، +770095095287