“ماسەلەن، 2021 جىلدان باستاپ 2،5 مىڭعا جۋىق اۋىل اكىمى سايلاندى. بۇل – اۋىلدىق ەلدى مەكەن باسشىلارىنىڭ جالپى سانىنىڭ 90%-ى. قالعاندارى اكىمنىڭ وكىلەتتىك مەرزىمى اياقتالعان كەزدە رەتىمەن سايلانا بەرەدى. جاڭا اكىمدەردىڭ 60 پايىزى بۇرىن مەملەكەتتىك قىزمەتتە جۇمىس ىستەمەگەن. ولاردىڭ اراسىندا ءارتۇرلى كاسىپ يەلەرى، ءتۇرلى پارتيا وكىلدەرى بار. ورتاشا جاسى – 46 جاس. ءبىر سوزبەن ايتساق، حالىق ءوزى تاڭداعان اكىمدەردىڭ قۇرامى ەداۋىر جاڭعىردى”، – دەيدى پرەزيدەنت.

توقايەۆ بىلتىر كۇزدە قازاقستاندا العاش رەت اۋدان، وبلىستىق ماڭىزى بار قالا اكىمدەرىنىڭ سايلاۋى وتكەنىن ەسكە سالدى. ناتيجەسىندە ەلىمىزدە جاڭا سايلاۋ جۇيەسى ىسكە اسادى.

“بارلىق وڭىردە جاڭا ەرەجە بويىنشا 45 اكىم سايلاندى. سايلاۋ قورىتىندىسى جان-جاقتى زەردەلەنىپ، سايلانعان اكىمدەردىڭ جۇمىسىنا تالداۋ جاسالعاننان كەيىن كەلەسى جىلدان باستاپ جاڭا جۇيەگە تۇپكىلىكتى كوشۋ تۋرالى تۇبەگەيلى شەشىم قابىلداندى. الداعى ۋاقىتتا اۋداندار مەن وبلىستىق ماڭىزى بار قالالاردىڭ اكىمدەرى قازىرگى اكىمدەردىڭ وكىلەتتىكتەرى (ياعني، روتاسيا كەزەڭدەرى) اياقتالۋىنا بايلانىستى وتەتىن تىكەلەي سايلاۋ ارقىلى عانا سايلانادى. بۇل – ساياسي جۇيەنى وزگەرتۋدەگى تاعى ءبىر ماڭىزدى قادام”، – دەدى توقايەۆ.