ءماجىلىس دەپۋتاتى نارتاي ارالباي ۇلى قورعانىس ءمينيسترى رۋسلان جاقسىلىقوۆقا جولداعان دەپۋتاتتىق ساۋال جولداپ، اسكەردەگى كەلەڭسىزدىكتى تىيۋ جانە الدىن الۋ بويىنشا ناقتى شارالاردى قابىلداۋ بويىنشا ۇسىنىستار جولدادى.
ونىڭ سوزىنشە، اسكەردە سوڭعى ءۇش جىلدا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيسيد تىركەلگەن، 20 اسكەري ادام وز-وزىنە قول سالۋعا وقتالعان.
– 2023 جىلعى تامىزدا اسكەري بولىمشەلەردىڭ بىرىندە كوماندير اسكەرگە جاڭادان كەلگەن ساربازدى ورىندىقپەن ۇرىپ، سوققىعا جىققان. 2024 جىلدىڭ ماۋسىم ايىندا جامبىل وبلىسىنىڭ ءبىر اسكەري بولىمشەسىندە اسكەرگە كەلگەنىنە 1-اق اي بولعان سارباز ەس-تۇسسىز جانساقتاۋ بولىمىنە تۇسكەن. ال تاياۋدا ورىن العان جاعداي بۇكىل وتانداسىمىزدىڭ اشۋ-ىزاسىن تۋعىزدى. ۇلتتىق ۇلاننىڭ جاۋىنگەرى ەربايان مۇحتار باسىنان العان جاراقاتتان بەس اي بويى ەس-تۇسسىز جاتىر. جاۋاپتىلار «ەربايان دارەتحاناعا قۇلاپ، جاراقاتتاندى» دەيدى. بۇعان كىم سەنەدى؟ جاراقاتتىڭ سالدارىنان ساربازدىڭ باسىنىڭ جارتىسىن الىپ تاستاۋعا تۋرا كەلگەن. ەندى وعان تۇراقتى كۇتىم قاجەت. ءقازىر اتا-اناسى ەرباياندى شەتەلگە ەمگە اكەتۋگە قام جاساۋدا، – دەگەن دەپۋتات ءمۇنداي شۋلى وقيعالاردىڭ ءبىرلى جارىمىن عانا كەلتىردى.
سونداي-اق ول قورعانىس مينيسترلىگى ايتقان اسكەري بولىمدەردەگى 50 مىڭنان استام بەينەكامەرانىڭ جازبالارىن سۇراپ، كەرەك كەزدە سولار نەگە جوق بولىپ شىعاتىنىنا نازار اۋداردى.
اسكەري قىزمەتكەرلەردىڭ الەۋمەتتىك جاعدايى تومەن، ولاردىڭ جالاقىسى 2008 جىلى عانا كوتەرىلگەنىن ەسكە سالعان دەپۋتات مينيسترگە تومەندەگىدەي ەكى ۇسىنىس جولادى.
- ەلىمىزدىڭ ارمياسىنداعى اتالعان كەلەڭسىزدىكتى تىيۋ جانە الدىن الۋ بويىنشا ناقتى شارالاردى قابىلداۋ.
- اسكەريلەردىڭ الەۋمەتتىك جاعدايىن جاقسارتۋعا باعىتتالعان جوبالادى قولعا الىپ، ولاردىڭ ىسكە اسۋىن جەدەلدەتۋ
پىكىر قالدىرۋ