الاتاۋ قالاسىنىڭ ءبىلىم ءبولىمى 1 قازاندا جەرگىلىكتى مەملەكەتتىك ورگاندار وكىلدەرى №1 جانە №47 مەكتەپتەرىنىڭ ۇستازدار ۇجىمدارىمەن كەزدەسكەنىن حابارلادى. مۇعالىمدەر جالاقىنىڭ اكىمشىلىك-اۋماقتىق قۇرىلىمنىڭ وزگەرۋىنە بايلانىستى قىسقارۋىنا الاڭداۋشىلىق ءبىلدىردى.
حابارلامادا 2024 جىلدىڭ 9 قاڭتارىنان باستاپ الاتاۋ قالاسىنا قونايەۆ قالاسى، ىلە جانە تالعار اۋداندارىنىڭ بۇرىنعى قۇرامىنا كىرگەن ءبىرقاتار ەلدى مەكەندەر قوسىلعانى ايتىلعان. وسىعان وراي قولدانىستاعى زاڭناماعا سايكەس، وسى اۋماقتاردا تۇراتىن بيۋدجەت سالاسى قىزمەتكەرلەرىنىڭ ەڭبەكاقى تولەۋ جۇيەسىندە وزگەرىستەر بولعانى اتاپ ءوتىلدى.
"تۋىنداعان ماسەلەلەردى جان-جاقتى قاراستىرۋ ماقساتىندا كەزدەسۋگە الاتاۋ قالاسى اكىمىنىڭ ورىنباسارى، قالالىق ءبىلىم ءبولىمىنىڭ باسشىسى، سونداي-اق وبلىستىق ءبىلىم جانە ىشكى ساياسات باسقارمالارىنىڭ وكىلدەرى شاقىرىلدى. كونسترۋكتيۆتى ديالوگ بارىسىندا ەڭبەكاقى ماسەلەلەرى عانا ەمەس، تۇرعىندار ءۇشىن ومىرلىك ماڭىزدى تاقىرىپتار: كولىكپەن قامتاماسىز ەتۋ، قوقىس شىعارۋ، گازداندىرۋ ماسەلەلەرى دە تالقىلاندى"، – دەلىنگەن حابارلامادا.
ءبىلىم ءبولىمى كەزدەسۋدىڭ ناتيجەسىندە مۇعالىمدەر ۇجىمدارىمەن ءوزارا تۇسىنىستىككە قول جەتكىزىلگەنىن مالىمدەدى.
پىكىر قالدىرۋ