ۇكىمەتتىڭ باسپا ءسوز قىزمەتى تاراتقان اقپاراتقا سايكەس، جوبانى «ك-اگرو حولدينگ» جانە «بايتەرەك» حولدينگى جۇزەگە اسىرۋدى جوسپارلاپ وتىر. بولاشاق زاۋىتتىڭ ورنى جامبىل وبلىسىندا دەپ بەلگىلەندى.

جوباعا سايكەس، زاۋىتتىڭ وڭدەۋ قۋاتى تاۋلىگىنە 8-10 مىڭ توننانى قۇرايدى، بۇل جىلىنا 1 ملن توننا قانت قىزىلشاسىن وڭدەۋگە جانە 130 مىڭ تونناعا جۋىق قانت وندىرۋگە مۇمكىندىك بەرەدى.

سونىمەن قاتار وڭدەۋ قۋاتىن ارتتىرۋ ءۇشىن جۇمىس ىستەپ تۇرعان قانت زاۋىتتارىنا جاڭعىرتۋ جۇرگىزىلۋدە. بۇل جۇمىس جاڭا زاۋىتتىڭ قۇرىلىسىمەن بىرگە قازاقستانعا قانت بويىنشا يمپورتقا تاۋەلدىلىكتى كەزەڭ-كەزەڭىمەن تومەندەتۋگە جانە قانت قىزىلشاسىنان تەرەڭدەتە قايتا وڭدەلگەن ونىمدەردى شىعارۋعا مۇمكىندىك بەرەدى.

قازىرگى ۋاقىتتا قازاقستاندا قانت قىزىلشاسىن وڭدەۋ بويىنشا جالپى تاۋلىكتىك قۋاتى 8،7 مىڭ توننا جانە 2،4 مىڭ توننا قامىس قۇراعىن وڭدەيتىن 4 قانت زاۋىتى جۇمىس ىستەيدى.

2023 جىلى رەسپۋبليكادا قانتتى ىشكى تۇتىنۋ كولەمى 507 مىڭ توننانى قۇرادى. ەل قاجەتتىلىگىنىڭ نەگىزگى كولەمى ەاەو ەلدەرىنەن دايىن قانتتى يمپورتتاۋ جانە قامىس قۇراعىن وڭدەۋ ەسەبىنەن قامتاماسىز ەتىلەدى.