ماقسات ورىسبايەۆ مەملەكەتتىك قورعانىستىق تاپسىرىس كوميتەتىن 7 جىل باسقارعان، وعان دەيىن كەدەن كوميتەتىندە جۇمىس ىستەگەن.

ورىسبايەۆتىڭ اتىنا THE SUMMIT عيماراتىنىڭ 20 جانە 23 قاباتتارىنداعى توعىز پاتەر تىركەلگەن. ورىسبايەۆ ينۆەستيسيا سالعان Dubai Marina ايماعىنداعى THE SUMMIT كەشەنى ءالى سالىنىپ بىتكەن جوق. قۇرىلىس اياقتالعاننان كەيىن عيمارات ءساندى 38 قاباتتى بيزنەس ورتالىعى مەن تۇرعىن ءۇي كەشەنىنە اينالۋى كەرەك. ءبىراق جوبا سوزىلىپ كەتتى. دۋبايداعى جىلجىمايتىن مۇلىك نارىعى تۋرالى Propsearh.ae سايتى عيماراتتىڭ اتاۋى مەن ازىرلەۋشىسى وزگەرگەنىن جازدى.

C4ADS قۇجاتتارىنا ساي، ورىسبايەۆتىڭ ۇلى ءىلياس دۋبايدا 17 جىلجىمايتىن مۇلىككە يەلىك ەتەدى. ونىڭ Palm Jumeirah ارالىنداعى ۆيللاسىنىڭ اۋدانى 600 شارشى مەتردەن اسادى. سونداي-اق پاتەرلەرى جاساندى ارالداعى MARINA RESIDENCE كەشەنىندە جانە دۋباي ماريناداعى GRANDEUR RESIDENCES پەن RIMAL-دا ورنالاسقان. سونىمەن قاتار ونىڭ ARMADA عيماراتىندا دا بىرنەشە كەڭسەسى بار. ءىلياس – قازاقستاندا تىركەلگەن ءۇش كومپانيانىڭ قۇرىلتايشىسى.

جىلجىمايتىن مۇلىك تىزىلىمىنە سايكەس، دۋبايداعى ەكى پاتەر ماقسات ورىسبايەۆتىڭ قىزى اينەل ورىسپايەۆاعا تيەسىلى. ەكى پاتەر دە GRANDEUR RESIDENCES تۇرعىن ءۇي كەشەنىندە ورنالاسقان. C4ADS تىزىلىمىنە ساي، دۋبايداعى ورىسبايەۆتاردىڭ اتىنا تىركەلگەن ۇيلەردىڭ جالپى قۇنى – سالىنىپ جاتقان عيماراتتاعى پاتەرلەردى قوسپاعاندا 5 جانە 9،5 ميلليارد تەڭگە ارالىعىندا.

ماقسات ورىسبايەۆ قىمبات ۇيلەردى ساتىپ الۋعا قاراجاتتى قايدان الدى؟ بۇنى ازاتتىق جۋرناليستەرى ونىڭ وزىنەن سۇراۋعا تىرىستى. ءبىراق ورىسبايەۆ دۋبايداعى جىلجىمايتىن مۇلىك تۋرالى سۇراقتى ەستىگەن بويدا تەلەفوندى ءوشىرىپ تاستادى.

Vlast.kzء-تىڭ دەرەگىنشە، ماقسات ورىسبايەۆ 2023 جىلى قورعانىس مينيسترلىگى مەكەمەلەرىنە 700 ميلليون تەڭگەدەن استام سوماعا مەملەكەتتىك ساتىپ الۋلار بويىنشا الاياقتىق جاساعانى تۋرالى قىلمىستىق ىستە اتالعان. ءبىراق وعان سىبايلاس جەمقورلىققا قاتىستى ايىپ تاعىلماعان.

جۋرناليستەر العان دۋبايداعى جىلجىمايتىن مۇلىك ءتىزىلىمى 2020-2022 جىلدار ارالىعىن قامتيدى. تىزىلىمگە ساي، 1550 قازاقستان ازاماتى دۋبايدا جالپى قۇنى ميلليارد دوللاردان اساتىن 2700 جىلجىمايتىن مۇلىككە يەلىك ەتەدى.