سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ فرانسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگەمەن كەزدەسىپ، ەكىجاقتى ىنتىماقتاستىق باعىتتارىن تالقىلادى.
اتاپ ايتقاندا، مينيسترلىك فرانسيانىڭ دامۋ اگەنتتىگىمەن (AFD) جانە فرانسيانىڭ گەولوگيالىق جانە تاۋ-كەن زەرتتەۋلەر بيۋروسىمەن (BRGM) ىنتىماقتاستىق تۋرالى مەموراندۋمعا جانە ءۇشجاقتى كەلىسىمگە قول قويۋعا دايىندالىپ جاتىر. ۆەدومستۆو اتالعان ۇيىمدارمەن بىرلەسىپ ىلە-بالقاش باسسەينىنە كەشەندى زەرتتەۋ جۇرگىزەدى. سونداي-اق جەراستى سۋلارىن زەرتتەۋ، مونيتورينگى، بارلاۋ جانە يگەرۋ باعىتىندا دا ىنتىماقتاستىق جولعا قويىلادى.
بۇدان بولەك، سۋ رەسۋرستارى جانە يرريگاسيا مينيسترلىگى حالىقارالىق سۋ بيۋروسىمەن (OiEau) ىنتىماقتاستىق مۇمكىندىكتەرىن قاراستىرۋدا.
سيلۆان گيوگە ءوز كەزەگىندە فرانسۋز كومپانيالارى قازاقستاندا سۋ شارۋاشىلىعى قۇرىلىستارىن سالۋ جانە رەكونسترۋكسيالاۋ بويىنشا جوبالارعا قاتىسۋعا نيەتتى ەكەندەرىن ايتتى. سونداي-اق سۋ شىعىنىن انىقتايتىن جانە سۋدى باسقارۋدى وڭتايلاندىراتىن كومپانيالار دا سەرىكتەستىك ورناتۋعا قىزىعۋشىلىق تانىتۋدا.
مەموراندۋم مەن كەلىسىمگە قول قويۋ ءبىزدىڭ ىنتىماقتاستىعىمىز ءۇشىن ماڭىزدى قادام بولماق. ءبىز فرانسۋز ارىپتەستەرىمىزبەن ۇزاق مەرزىمدى جانە ناتيجەلى جۇمىس ىستەۋگە نيەتتىمىز، - دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
پىكىر قالدىرۋ