تەرگەۋ بەس باپ بويىنشا جۇرگىپ جاتىر — ق ر قك-نىڭ 99-بابى، 2ء-بولىمى («ادام ءولتىرۋ»)، 293-بابى، 3ء-بولىمى («بۇزاقىلىق»)، 115-بابى («قورقىتۋ»)، 432-بابى («قىلمىستى جاسىرىپ قالۋ») جانە 434-بابى («قىلمىس تۋرالى حابارلاماۋ») بويىنشا.

تەرگەۋ بارىسىن جەكە باقىلاپ وتىرمىن، وقيعا ورنىندا مينيسترلىكتىڭ ورتالىق اپپاراتىنىڭ قىزمەتكەرلەرى دە جۇمىس ىستەپ جاتىر. باسىندا الەۋمەتتىك جەلىلەردە وقيعانىڭ سەبەپتەرى تۋرالى انىق ەمەس اقپاراتتىڭ كەڭىنەن تارالۋىنا بايلانىستى مينيسترلىك بەلگىلەگەن تارتىپپەن (قىلمىستىق ءىس جۇرگىزۋ كودەكسىنىڭ 201-بابى تالاپتارىنا ساي) 15 قازاندا بۇقارالىق اقپارات قۇرالدارى وكىلدەرىنىڭ قاتىسۋىمەن بريفيڭ وتكىزدى، وندا تەرگەۋدىڭ كەيبىر دەرەكتەرى جاريالاندى، — دەدى ءىىم باسشىسى ەرجان سادەنوۆ دەپۋتاتتىق ساۋالعا جاۋابىندا.

ول قازىرگى ۋاقىتتا ادام ءولتىردى دەگەن كۇدىكپەن سەگىز ادام، ال قىلمىس تۋرالى حابارلاماۋ تۋرالى باپ بويىنشا ءۇش ادام سوتتىڭ سانكسياسىمەن قاماۋعا الىنعانىن ەسكە سالدى.

- تەرگەۋ جالعاسىپ جاتىر. ونىڭ بارىسىندا وقيعا ورنىندا بولعان باسقا ادامداردىڭ قاتىسقان-قاتىسپاعانى تەكسەرىلىپ، ولاردىڭ ارەكەتتەرىنە قۇقىقتىق باعا بەرىلەدى. جالپى، قازىرگى ۋاقىتتا ەلدەگى كريمينوگەندىك جاعداي تۇراقتى، ىشكى ىستەر ورگاندارى پرەزيدەنتتىڭ قۇقىقتىق ءتارتىپتى قامتاماسىز ەتۋ جونىندەگى تاپسىرمالارىن ورىنداۋ شەڭبەرىندە مۇددەلى مەملەكەتتىك ورگاندارمەن بىرلەسىپ كەشەندى شارالار جۇرگىزىپ جاتىر، — دەپ تولىقتىردى ەرجان سادەنوۆ.

ەستەرىڭىزگە سالا كەتەيىك، ەلىمىزدە 4 قازانعا قاراعان ءتۇنى 16 جاستاعى شەرزات بولاتتى ءبىر توپ ادام اكە-شەشەسىنىڭ كوزىنشە پىشاقتاپ كەتكەن. ءجاسوسپىرىم اۋرۋحانادا كوز جۇمدى.

بۇعان دەيىن شەرزات بولاتتىڭ وتباسى تۇرعان ءۇيدى بەلگىسىز بىرەۋلەر ورتەپ كەتكەنىن جازعان ەدىك.