اقش ۇكىمەتى قازاقستاننان جالعا جەر الادى. ءتيىستى زاڭ جوباسىن ءماجىلىس دەپۋتاتتارى قارايدى.
بۇل باستاما اياسىندا قازاقستان مەن امەريكا قۇراما شتاتتارى ۇكىمەتتەرى اراسىنداعى كەلىسىمدى راتيفيكاسيالاۋ جوسپارلانعان. وسى كەلىسىم بويىنشا امەريكالىق تاراپ الماتىدا كونسۋلدىق مەكەمەنىڭ عيماراتىن سالۋ ءۇشىن جەر تەلىمىن جالعا الادى.
دەپۋتات ايگۇل قۇسپاننىڭ مالىمدەۋىنشە، قارالىپ جاتقان كەلىسىمگە بىلتىر 27 قىركۇيەكتە نيۋ-يوركتە قول قويىلعان.
"كەلىسىمنىڭ ماقساتى – اقش ۇكىمەتىنە الماتىدا كونسۋلدىق مەكەمە سالۋ جانە پايدالانۋ ءۇشىن 70 مىڭ شارشى مەتردەن استام جەر تەلىمىن 49 جىل مەرزىمگە جالعا بەرۋ. كەلىسىمنىڭ ەرەجەلەرى جەر تەلىمىن بەرۋ ءتارتىبى مەن شارتتارىن انىقتايدى. كوميتەت زاڭ جوباسىن جۇمىسقا قابىلداۋعا جانە وعان قورىتىندى ازىرلەۋگە دايىن. قولداۋلارىڭىزدى سۇرايمىن"، – دەدى قۇسپان ءماجىلىستىڭ پلەنارلىق وتىرىسىندا.
حالىقارالىق ىستەر، قورعانىس جانە قاۋىپسىزدىك كوميتەتى زاڭ جوباسى بويىنشا قورىتىندى ازىرلەيدى. قۇجات پالاتاداعى كەلەسى وتىرىستاردا قارالادى.
ەسكە سالا كەتەيىك، 2024 جىلدىڭ قىركۇيەك ايىندا باق-تا قازاقستان مەن اقش اراسىنداعى كەلىسىم جوباسى جاريالانعان بولاتىن. بۇل كەلىسىم بويىنشا اقش الماتىدا 70 مىڭ شارشى مەتردەن استام جەر تەلىمىن 49 جىل مەرزىمگە جالعا الماق.
پىكىر قالدىرۋ