اگروونەركاسىپتىك كەشەن ەكونوميكالىق ءوسۋدىڭ نەگىزگى قوزعاۋشى كۇشتەرىنىڭ بىرىنە اينالۋى ءتيىس. بۇل بيزنەس ءۇشىن دە، مەملەكەت ءۇشىن دە باسىمدىق بولىپ تابىلادى. بۇل تۋرالى اۋىل شارۋاشىلىعى قىزمەتكەرلەرى فورۋمىندا مەملەكەت باسشىسى قاسىم-جومارت توقايەۆ مالىمدەگەن ەدى.

«ەڭ الدىمەن، بۇل ازىق-تۇلىك قاۋىپسىزدىگىن قامتاماسىز ەتۋ تۇرعىسىنان ماڭىزدى. اۋىل تۇرعىندارىنىڭ ءومىرى مەن ءال-اۋقاتى دا سالانىڭ جاي-كۇيىنە تىكەلەي بايلانىستى»، - دەپ اتاپ ءوتتى مەملەكەت باسشىسى.

اباي وبلىسىندا اگروونەركاسىپتىك كەشەندى دامىتۋ جالعاسۋدا. 2024 جىلى اۋىل شارۋاشىلىعى داقىلدارىنىڭ ەگىس القابى 760،2 مىڭ گا قۇرادى. بۇعان سۋ ۇنەمدەۋ تەحنولوگيالارىن ءارتاراپتاندىرۋ مەن ەنگىزۋدىڭ ناتيجەسىندە قول جەتتى. اتاپ ايتقاندا، جەمشوپ داقىلدارىنىڭ اۋدانى 17،1 مىڭ گەكتارعا، كارتوپ – 2،3 مىڭ گەكتارعا ۇلعايتىلدى.

ءداندى جانە مايلى داقىلداردىڭ ونىمدىلىگى گەكتارىنا 12-دەن 15 سەنتنەرگە دەيىن ءوستى. 2024 جىلى سۋارمالى جەردىڭ كولەمى 30،1 مىڭ گا، ونىڭ ىشىندە 13،8 مىڭ گا جاڭبىرلاتىپ جانە تامشىلاتىپ سۋارۋدى پايدالاندى. بۇل جەمشوپ كولەمىن ارتتىرىپ قانا قويماي، مال شارۋاشىلىعىنىڭ دامۋىنا دا ىقپال ەتتى. 

وتكەن جىلى وبلىستا مال باسى ايتارلىقتاي ءوستى: ءىرى قارا مال – 42،1%، قوي – 21،4%، ەشكى-40،7% - عا ارتتى. جىلقى سانى بۇرىنعى دەڭگەيدە قالدى-350 مىڭ باس. 

مال شارۋاشىلىعى ونىمدەرىنىڭ (ەت ونىمدەرى) ونىمدىلىگىندە وڭ ديناميكا بايقالادى. 2024 جىلى سيىر ەتى 1،1%، قۇس ەتى 1،1%، ءسۇت 2،5%، تاۋىق جۇمىرتقاسى 3،1%-عا ءوستى.

وڭىردە كوكونىس ونىمدەرىن ساقتاۋ ءۇشىن جالپى سىيىمدىلىعى 51،8 مىڭ توننالىق 13 قويما جۇمىس ىستەيدى. بۇل جەرگىلىكتى اۋىل شارۋاشىلىعى وندىرۋشىلەرىنىڭ قاجەتتىلىكتەرىن وتەيدى. 

«2024 جىلى اگروونەركاسىپتىك كەشەننىڭ نەگىزگى كاپيتالىنا ينۆەستيسيالار تارتۋ جوسپارلى كورسەتكىشتەردەن اسىپ ءتۇستى. بولجام بويىنشا 40،5 ملرد تەڭگە، ءىس جۇزىندە 43،2 ملرد تەڭگە سالىندى. 2025 جىلى كەمىندە 48 ملرد تەڭگە تارتۋ كوزدەلگەن.  ايماقتا 2 ەت كومبيناتى، 1 ەتتى باعىتتاعى تاۋىق فابريكاسى مەن 10 مىڭ باسقا ارنالعان  وندىرىستىك بورداقىلاۋ الاڭىن سالۋ مەن 5،4 مىڭ گەكتار ەگىستىك القاپقا سۋارۋ جۇيەسى ورناتىلماق. اگرارلىق سەكتوردى قولداۋعا مەملەكەت 14،4 ملرد تەڭگە سۋبسيديا ءبولدى. يمپورتتى الماستىرۋ بويىنشا جۇمىس جالعاسۋدا. ءوڭىر ءوزىن نەگىزگى ازىق-تۇلىك تاۋارلارىنىڭ 14 تۇرىمەن قامتاماسىز ەتەدى»، - دەدى وبلىس اكىمىنىڭ ورىنباسارى قۋانىش سۇلەيمەنوۆ.

2024 جىلى وڭىردە 76،7 مىڭ توننا ۇن، 2،5 مىڭ توننا ماكارون ونىمدەرى، 122،8 مىڭ توننا تازارتىلماعان كۇنباعىس مايى، 4،6 مىڭ توننا وڭدەلگەن ءسۇت، 320 توننا ىرىمشىك پەن سۇزبە، 179 توننا سارى ماي جانە 1 254 توننا شۇجىق ونىمدەرى ءوندىرىلدى. 

ماڭىزدى جوبالاردىڭ ءبىرى - 2025 جىلى قۋاتتىلىعى جىلىنا 72 مىڭ توننا بولاتىن «Qazaq Astyq Group» ج ش س كاسىپورنىندا تازارتىلعان وسىمدىك مايىن ءوندىرۋ جەلىسىن ىسكە قوسۋ. جوبانىڭ ينۆەستيسياسى 7،2 ملرد تەڭگەنى قۇرايدى. 

اكىم ورىنباسارى بۇل شارالاردىڭ بارلىعى ءوڭىردىڭ ازىق-تۇلىك قاۋىپسىزدىگىن نىعايتۋعا، اۋىل شارۋاشىلىعىن دامىتۋعا جانە يمپورتتىق تاۋارلارعا تاۋەلدىلىكتى ازايتۋعا باعىتتالعانىن ايتتى.