جاقىندا جەلىدە سوتتالعان كۋاندىق بيشىمبايەۆتىڭ اكەسى تاراز قالاسىندا جەكەمەنشىك ۋنيۆەرسيتەت اشپاقشى دەگەن اقپارات تارادى.
2025 جىلعى 3 ساۋىردە عىلىم جانە جوعارى ءبىلىم مينيسترلىگىنىڭ قوعاممەن بايلانىس دەپارتامەنتىنىڭ ديرەكتورى – باسپا ءسوز قىزمەتىنىڭ جەتەكشىسى ولجاس بەركىنبايەۆ الەۋمەتتىك جەلىلەردەگى بۇل اقپاراتتارعا بايلانىستى مالىمدەمە جاسادى.
ونىڭ ايتۋىنشا، "ءبىلىم تۋرالى" زاڭنىڭ 5-3-بابىنا سايكەس، كادرلاردى دايارلاۋ باعىتتارى مەن وقىتۋ تۇرلەرى بويىنشا جوعارى جانە جوعارى وقۋ ورنىنان كەيىنگى ءبىلىم بەرۋگە ارنالعان ءبىلىم بەرۋ قىزمەتىن جۇزەگە اسىرۋ ءۇشىن زاڭدى تۇلعالارعا ليسەنزيا جانە (نەمەسە) ليسەنزياعا قوسىمشا بەرۋ - عىلىم جانە جوعارى ءبىلىم سالاسىنداعى ۋاكىلەتتى ورگاننىڭ قۇزىرىندا.
وسىعان بايلانىستى، ول بىلاي دەپ جالعاستىردى: جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى كەز كەلگەن ءبىلىم بەرۋ قىزمەتى مىندەتتى تۇردە ليسەنزيالانۋى ءتيىس.
سونداي-اق جەكە جانە زاڭدى تۇلعالاردىڭ "رۇقساتتار جانە حابارلامالار تۋرالى" زاڭدا بەلگىلەنگەن رۇقسات بەرۋ نەمەسە حابارلاۋ تارتىبىمەن جۇزەگە اسىرىلاتىن قىزمەتتى نەمەسە ارەكەتتەردى (وپەراسيالاردى) ءتيىستى رۇقسات الماي نەمەسە ءتيىستى حابارلاما جىبەرمەي جۇزەگە اسىرۋىنا جول بەرىلمەيدى.
جوعارىدا ايتىلعاندارعا سۇيەنە وتىرىپ، مينيسترلىك Bishimbayev University وقۋ ورنىنىڭ ءبىلىم بەرۋ قىزمەتىن جۇزەگە اسىرۋ ءۇشىن ليسەنزيا الۋى مۇمكىندىگىن جوققا شىعارادى، سونداي-اق “ە-ليسەنزيالاۋ” اقپاراتتىق جۇيەسىندە ەشقانداي ءوتىنىم تىركەلمەگەنىن حابارلايدى، - دەدى ولجاس بەركىنبايەۆ.
پىكىر قالدىرۋ