رەسەي پرەزيدەنتى ۆلاديمير پۋتين قاسىم-جومارت توقايەۆقا اكەسى كەمەل توقايەۆتىڭ ماراپاتتاۋ پاراعىن تابىس ەتتى.
قۇجات رەسەي قورعانىس مينيسترلىگىنىڭ مۇراعاتىنان تابىلعان. وندا كەمەل توقايەۆ كەڭەس وداعىنىڭ باتىرى اتاعىنا ۇسىنىلعانى كورسەتىلگەن. الايدا بۇل جوعارى اتاق وعان بەرىلمەگەن.
كەمەل توقايەۆ پولشا جەرىندەگى شايقاستاردا كورسەتكەن ەرلىگى مەن قاھارماندىعى ءۇشىن II دارەجەلى وتان سوعىسى وردەنىمەن ماراپاتتالعان.
بۇعان دەيىن گۆارديا سەرجانتى كەمەل توقايەۆتىڭ ماراپاتتاۋ پاراعى ينتەرنەت جەلىسىندە تارالعانى حابارلانعان بولاتىن.
كەمەل توقايەۆ 1942 جىلى مايدانعا اتتانىپ، كوپ ۇزاماي 226-اتقىشتار ديۆيزياسىندا وترياد كومانديرى رەتىندە قىزمەت ەتتى. جاراقات العان سوڭ 7-گۆارديالىق تانك پولكىندە اسكەري قىزمەتىن جالعاستىردى.
ول ءوزىنىڭ “سولدات سوعىسقا اتتاندى” اتتى ەڭبەگىندە مايدانداعى جاۋىنگەرلەردىڭ اۋىر تاعدىرىن، سوعىستىڭ قاسىرەتى مەن زاردابىن شىنايى سۋرەتتەيدى.
