مارات سپاتايەۆ شىمكەنت قالالىق جاستار رەسۋرستىق ورتالىعى باسشىسى قىزمەتىنەن كەتتى
شىمكەنت قالالىق جاستار رەسۋرستىق ورتالىعىنىڭ باسشىسى بولعان مارات سپاتايەۆ قىزمەتىنەن بوساتىلدى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا حابارلادى.
ءوز جازباسىندا ول ورتالىقتاعى باسشىلىق قىزمەتىن رەسمي تۇردە اياقتاعانىن ايتىپ، ارىپتەستەرىنە، باسشىلىققا جانە سەرىكتەستەرىنە العىس ءبىلدىردى.
– بۇل مەن ءۇشىن ءومىرىمنىڭ ماڭىزدى، جاۋاپتى ءارى ەرەكشە كەزەڭدەرىنىڭ ءبىرى بولدى. وسى ۋاقىت ىشىندە بىرگە جۇمىس ىستەگەن بارلىق ارىپتەستەرىمە، سەنىم بىلدىرگەن باسشىلىققا جانە قولداۋ كورسەتكەن سەرىكتەستەرگە زور العىسىمدى بىلدىرەمىن. جاستارمەن جۇمىس ىستەۋ – مەنىڭ جۇرەك قالاۋىم ءارى ومىرلىك ۇستانىمىم، – دەپ جازدى ول.
مارات سپاتايەۆ سونىمەن قاتار جاستار ساياساتى سالاسىنداعى ىزدەنىسىن ءارى قاراي جالعاستىراتىنىن ايتتى.
– الداعى ۋاقىتتا دا شىرايلى شىمقالامىزدىڭ گۇلدەنۋىنە بىرگە اتسالىسامىز دەگەن ۇمىتتەمىن. ەكس-ارىپتەستەرىمە ايتارىم – ءوز باسىم ەشقاشان “يا ناچالنيك – تى دۋراك” دەيتىن كەڭەستىك كوزقاراستا بولعان جوقپىن. ءومىر وتكىنشى، ال شىنايى سىيلاستىق – ماڭگىلىك. جاستاردىڭ بولاشاعىنا از دا بولسا ۇلەس قوسۋ – ۇلكەن مارتەبە، – دەدى ول.
ەسكە سالا كەتەيىك، بۇعان دەيىن مارات سپاتايەۆ الەۋمەتتىك جەلىدەگى جازباعا "لايك" باسپاعان قىزمەتكەرلەرىن جازالاعانى تۋرالى اقپارات تاراعان بولاتىن.
