كوكتەمگى ەگىس جۇمىستارىنا 400،9 مىڭ توننا ديزەل ءبولىندى
ەنەرگەتيكا جانە اۋىل شارۋاشىلىعى مينيسترلىكتەرى 1 اقپان مەن 30 ماۋسىم ارالىعىندا 2025 جىلعى كوكتەمگى ەگىس جۇمىستارىنا 400،9 مىڭ توننا ديزەل وتىنىن جەتكىزۋ كەستەسىن بەكىتتى. بۇل تۋرالى ەنەرگەتيكا ۆيسە-مينيسترى اقكەنجەنوۆ حابارلادى.
ديزەل وتىنىنىڭ باعاسى قوسىلعان قۇن سالىعىن قوسا ەسەپتەگەندە 1 ليترىنە 254 تەڭگە بولىپ بەلگىلەندى.
اۋىل شارۋاشىلىعى وندىرۋشىلەرى ءۇشىن وتىن قوزعالىسىنىڭ اشىقتىعىن قامتاماسىز ەتۋ ماقساتىندا:
-
جەكە پين-كودتار ەنگىزىلدى؛
-
ديزەل وتىنى ءتۇرلى تۇستەرگە (سارى، كوك، قىزىل) بويالدى؛
-
ەلەكتروندى شوت-فاكتۋرا جۇيەسىندە ارنايى ۆيرتۋالدى قويما قۇرىلدى.
مينيسترلىك اقپاراتىنا سايكەس، ءاقپان-ساۋىر ارالىعىندا قاجەتتى كولەمنىڭ 54%-ى (215 مىڭ توننا) جونەلتىلگەن. ديزەلدى ۋاقىتىلى جەتكىزۋ ءۇشىن جەتكىزۋشىلەر شارت جاسالعاننان كەيىن 10 جۇمىس كۇنى ىشىندە تولەم جاساۋعا مىندەتتى. جەتكىزۋ باسىم تارتىپپەن جانە تۇراقتى باقىلاۋمەن جۇزەگە اسىرىلادى.
