حالىقارالىق ىزدەۋدە جۇرگەن "استانا LRT" كومپانياسىنىڭ ەكس-باسشىسى تالعات اردان تۇركيانىڭ انتاليا قالاسىندا ۇستالىپ، قازاقستانعا دەپورتاسيالانباق. بۇل تۋرالى ۇلتتىق قاۋىپسىزدىك كوميتەتى (ۇقك) رەسمي تۇردە حابارلادى.
قازاقستان باس پروكۋراتۋراسى 2019 جىلدىڭ قىركۇيەگىندە تۇركيانىڭ ادىلەت مينيسترلىگىنە ارداندى ەكستراديسيالاۋ تۋرالى سۇراۋ جولداعان بولاتىن. وسىعان وراي، تۇركيانىڭ قۇقىق قورعاۋ ورگاندارى ىزدەستىرۋ شارالارىن باستاعان. بيىل ۇقك ارداننىڭ ناقتى قايدا جاسىرىنعانىن انىقتاپ، ونى تۇرىك تاراپى انتاليادا قولعا ءتۇسىردى.
9 مامىردا انتاليا قالاسىنىڭ سوتى ونى قازاقستانعا قايتارۋ تۋرالى شەشىم شىعارىپ، قازىرگى تاڭدا اردان قاماۋدا وتىر. قازاقستاننىڭ قۇزىرلى ورگاندارى ەكس-شەنەۋنىكتى ەلگە جەتكىزۋگە قاتىستى قۇقىقتىق راسىمدەردى باستادى.
ەسكە سالساق، تالعات اردان "استانا LRT" جوباسىنا قاتىستى سىبايلاس جەمقورلىق ءىسى بويىنشا سىرتتاي سوتتالعان بولاتىن. 2023 جىلدىڭ 3 مامىرىندا استانانىڭ قىلمىستىق ىستەر جونىندەگى اۋدانارالىق سوتى ونى كىنالى دەپ تانىپ، مەملەكەتتىك قىزمەتتە لاۋازىم يەلەنۋ قۇقىعىنان ءومىر بويىنا ايىرىپ، 9 جىلعا باس بوستاندىعىنان ايىرۋ تۋرالى ۇكىم شىعاردى.
استانا LRT ءىسى – ەلدەگى ەڭ داۋلى ينفراقۇرىلىم جوبالارىنىڭ ءبىرى. قوعام مەن بۇقارالىق اقپارات قۇرالدارى تاراپىنان سىنعا ۇشىراعان بۇل ءىستىڭ تەرگەۋى ۇزاققا سوزىلدى. ەندى ونىڭ باستى فيگۋرانتى قازاقستان سوتىنىڭ الدىندا جاۋاپ بەرمەك.
