24 مامىردا قازاقستان پرەزيدەنتى قاسىم-جومارت توقايەۆ ەربولات دوسايەۆتى الماتى قالاسىنىڭ اكىمى قىزمەتىنەن بوساتۋ تۋرالى جارلىققا قول قويدى.

مەملەكەت باسشىسىنىڭ جارلىعىمەن ەربولات اسقاربەك ۇلى دوسايەۆ الماتى قالاسىنىڭ اكىمى قىزمەتىنەن بوساتىلدى. بۇل تۋرالى اقوردانىڭ رەسمي Telegram ارناسىندا جاريالاندى.

ەربولات دوسايەۆ بۇل لاۋازىمدى 2022 جىلعى 31 قاڭتاردان باستاپ اتقارىپ كەلگەن بولاتىن.

ول 1970 جىلى 21 مامىردا الماتى قالاسىندا دۇنيەگە كەلگەن. الماتى ەنەرگەتيكالىق ينستيتۋتىن جانە ماسكەۋدەگى باۋمان اتىنداعى تەحنيكالىق ۋنيۆەرسيتەتتى ءتامامداعان.

قىزمەتتىك جولىن 1997 جىلى بانك سەكتورىندا باستاعان دوسايەۆ كەيىن ءبىرقاتار مەملەكەتتىك لاۋازىمداردى اتقاردى. اتاپ ايتقاندا، ەنەرگەتيكا، يندۋستريا جانە ساۋدا، قارجى ۆيسە-مينيسترى، دامۋ بانكى ديرەكتورلار كەڭەسىنىڭ ءتوراعاسى، قارجى ءمينيسترى، دەنساۋلىق ساقتاۋ ءمينيسترى، ەكونوميكالىق دامۋ جانە ساۋدا ءمينيسترى، ۇلتتىق ەكونوميكا ءمينيسترى، ۇلتتىق بانك ءتوراعاسى، پرەمەر-مينيستردىڭ ورىنباسارى سىندى قىزمەتتەردە بولدى.

سوڭعى جىلدارى الماتى قالاسىنىڭ اكىمى قىزمەتىن اتقارعان شەنەۋنىكتىڭ ورنىن كىم باساتىنى ازىرگە بەلگىسىز. بۇعان دەيىن 23 مامىردا قالالىق ءماسليحاتتىڭ كەزەكتى وتىرىسى وتەتىنى جانە وندا جاڭا اكىم كانديداتۋراسىنا كەلىسىم بەرۋ ماسەلەسى قارالاتىنى حابارلانعان بولاتىن.