31 مامىر – قازاقستان حالقى ءۇشىن ادا كۇن. بۇل كۇنى ەلدىڭ تۇكپىر-تۇكپىرىندە ساياسي قۋعىن-سۇرگىن مەن اشارشىلىق قۇرباندارىن ەسكە الۋ شارالارى وتەدى. الماتى قالاسىندا دا وسىعان وراي تاعىلىمدى ءىس-شارا ۇيىمداستىرىلىپ، وتكەننىڭ اششى ساباعىن ەسكە سالدى.
قالا اكىمى دارحان ساتىبالدى قاراعايلى سكۆەرىندە ورنالاسقان مەموريال كەشەنىنە كەلىپ، 1931–1933 جىلدارى اشارشىلىقتان جانە ستاليندىك رەپرەسسيا قۇربانىنا اينالعان جازىقسىز جانداردىڭ رۋحىنا تاعزىم ەتىپ، ەسكەرتكىشكە گۇل شوقتارىن قويدى. بۇل — تەك فورمالدى ءراسىم ەمەس، ەل تاريحىنىڭ ەڭ قايعىلى بەتتەرىن ەسكە الىپ، حالىق جادىندا ماڭگى ساقتاۋعا باعىتتالعان سيمۆولدىق ارەكەت.
ەسكە الۋ شاراسىنا قوعام قايراتكەرلەرى، قۋعىن-سۇرگىنگە ۇشىراعانداردىڭ ۇرپاقتارى، قالالىق ءماسليحات دەپۋتاتتارى، زيالى قاۋىم وكىلدەرى مەن جاستار ۇيىمدارىنىڭ مۇشەلەرى قاتىستى. ولار ءبىر مينۋت ۇنسىزدىك جاريالاپ، تاريحي ادىلەتسىزدىكتىڭ قۇربانى بولعان اتا-بابالار رۋحىنا باس ءيدى.
— ءبىز بۇگىن زۇلمات جىلدارى جاپپاي اشتىق پەن ساياسي قۋعىن-سۇرگىننىڭ قۇربانىنا اينالعان مىڭداعان قانداستارىمىزدىڭ رۋحىن ەسكە الىپ، ولاردىڭ الدىنداعى ادامدىق ءارى ازاماتتىق بورىشىمىزدى وتەۋ ءۇشىن جينالدىق. ءبىر مينۋت ۇنسىزدىك – بۇل ەستەلىكتى ساقتاۋ عانا ەمەس، قۇرمەتتىڭ دە، وتكەننەن ساباق الۋدىڭ دا كورىنىسى. ءبىزدىڭ پارىزىمىز – سول زۇلماتتى ۇمىتپاۋ، بۇگىنگى بەيبىت كۇنىمىزدىڭ باعاسىن ءبىلۋ، — دەدى قالا اكىمى دارحان ساتىبالدى ءوز سوزىندە.
ءىس-شارانىڭ رەسمي ءبولىمى اياقتالعان سوڭ قالا باسشىسى قاتىسۋشىلارمەن، قوعام وكىلدەرىمەن جانە ءماسليحات دەپۋتاتتارىمەن ەركىن فورماتتا پىكىرلەسىپ، مۇنداي شارالاردىڭ جاستاردى تاريحي سانانى قۇرمەتتەۋگە تاربيەلەۋدەگى ماڭىزىن اتاپ ءوتتى.
بۇل كۇن — وتكەنگە تاعزىم، بولاشاققا ءۇمىت. اشارشىلىق پەن قۋعىن-سۇرگىن – حالقىمىزدىڭ جۇرەگىندە جازىلمايتىن جارا. ءبىراق ول جارا — ۇلت رەتىندە بىرىگۋگە، ادىلەتتى قوعام قۇرۋعا دەگەن ۇمتىلىستىڭ نەگىزى. سوندىقتان ءاربىر ازامات ءۇشىن 31 مامىر – تەك ەسكە الۋ عانا ەمەس، ەلدىڭ تاريحىنا، تاعدىرىنا دەگەن جاۋاپكەرشىلىك كۇنى.
