پرەمەر-مينيستر ولجاس بەكتەنوۆ ءماجىلىس دەپۋتاتتارىنىڭ قازاقستاننىڭ ءتورتىنشى عارىشكەرىن عارىشقا ۇشىرۋعا قاتىستى ساۋالىنا جاۋاپ بەردى.

ول حالىقارالىق عارىش باعدارلامالارىنا قازاقستاندىق عارىشكەرلەردىڭ قاتىسۋى ۇلتتىق جانە حالىقارالىق دەڭگەيدە نەگىزدەلگەن جاعدايدا عانا ىسكە اسىرىلاتىنىن اتاپ ءوتتى. «باسقارىلاتىن عارىش باعدارلامالارى ەداۋىر قارجىلىق شىعىندى قاجەت ەتەدى. بۇل تەك ۇشۋعا عانا ەمەس، عارىشكەردى دايارلاۋ، عىلىمي باعدارلامالار ازىرلەۋ، لوگيستيكا مەن ۇشۋدان كەيىنگى قىزمەت كورسەتۋگە دە بايلانىستى»، – دەدى ۇكىمەت باسشىسى.

سونداي-اق، بەكتەنوۆ ءتورتىنشى عارىشكەردى ۇشىرۋ ماسەلەسىنە بارىنشا سالماقتى ءارى پراگماتيكالىق ءتاسىل قاجەت ەكەنىن ايتتى. ونىڭ ايتۋىنشا، جوبا وزەكتىلىگى مەن نەگىزدىلىگى دالەلدەنگەن جاعدايدا، ءتيىستى شارالار حالىقارالىق مىندەتتەمەلەر مەن ەلدىڭ قارجىلىق-ەكونوميكالىق مۇمكىندىكتەرىن ەسكەرە وتىرىپ جۇزەگە اسىرىلادى.

ايتا كەتەيىك، بۇعان دەيىن مەملەكەت باسشىسى قاسىم-جومارت توقايەۆ «بايقوڭىر» عارىش ايلاعىنىڭ 70 جىلدىعىنا ارنالعان ۆيدەو ۇندەۋ جولداعان بولاتىن. سونىمەن قاتار، قازىرگى ۋاقىتتا «بايقوڭىر» كەشەنىندە ءتۋريزمدى دامىتۋ تۇجىرىمداماسى ازىرلەنىپ جاتىر.