مەملەكەتتىك رامىزدەر – ەلدىگىمىزدىڭ نىشانى

قازاقستان رەسپۋبليكاسىنىڭ مەملەكەتتىك رامىزدەرى – تۋ، ەلتاڭبا جانە ءانۇران – تاۋەلسىزدىگىمىزدىڭ باستى بەلگىلەرى. ولار ەلىمىزدىڭ تاريحىن، مادەنيەتىن، رۋحىن جانە بولاشاعىن ايقىندايتىن قاسيەتتى نىشاندار بولىپ تابىلادى. ەلباسى اتاپ وتكەندەي، ءاربىر ازامات بۇل رامىزدەردى تۇمارداي قاسيەت تۇتۋى ءتيىس.

مەملەكەتتىك رامىزدەر 1992 جىلدىڭ 4 ماۋسىمىندا قابىلداندى. بۇل كۇن – قازاقستان تاريحىندا ماڭىزدى كۇندەردىڭ ءبىرى. تۋ مەن ەلتاڭبا وسى كۇنى بەكىتىلسە، ءانۇران ءماتىنى 11 جەلتوقساندا قابىلداندى. رامىزدەردى دايىنداۋ ءۇشىن ارنايى كوميسسيا قۇرىلىپ، بۇكىل ەل بويىنشا بايقاۋ ۇيىمداستىرىلدى. مىڭداعان جوبا ۇسىنىلدى، ولاردىڭ ىشىنەن بۇگىنگى كۇنگە لايىقتىسى تاڭدالدى.

بۇگىندە تۋىمىز الەمدىك ارەنالاردا جەلبىرەپ، ءانۇرانىمىز حالىقارالىق سپورت جارىستارىندا شىرقالىپ كەلەدى. بۇل – ەل جەتىستىگىنىڭ ايعاعى. مەملەكەتتىك رامىزدەر تەك رەسمي بەلگىلەر ەمەس، ولار – ەلدىك سانا مەن پاتريوتتىق رۋحتىڭ قاينار كوزى. ولاردى قاستەرلەۋ – ءار ازاماتتىڭ پارىزى.

رامىزدەر ارقىلى ەلىمىزدى الەم تانيدى، ال جاس ۇرپاق وسى رامىزدەر ارقىلى وتانسۇيگىشتىككە تاربيەلەنەدى. سوندىقتان بالاباقشادان باستاپ بارلىق وقۋ ورىندارىندا رامىزدەردى قۇرمەتتەۋگە ەرەكشە ءمان بەرىلەدى. بۇل – بولاشاقتىڭ كەپىلى.