اقش پرەزيدەنتى دونالد ترامپ اۋعانستان، ميانما، چاد، كونگو، ەكۆاتورلىق گۆينەيا، ەريترەيا، گايتي، يران، ليۆيا، سومالي، سۋدان جانە يەمەن ازاماتتارىنا ەلگە كىرۋگە تىيىم سالاتىن جارلىققا قول قويدى. اق ءۇي مالىمەتىنشە، بۇل ەلدەر «ءتيىمدى تەكسەرۋ جۇرگىزە المايدى جانە اقش ءۇشىن جوعارى ءقاۋىپ توندىرەدى» دەپ تانىلعان.
سونىمەن قاتار توگو، تۇرىكمەنستان، بۋرۋندي، كۋبا، لاوس، سەررا-لەونە جانە ۆەنەسۋەلا ازاماتتارىنا قاتىستى ءىشىنارا شەكتەۋلەر ەنگىزىلدى. بۇل ەلدەر دە ءقاۋىپ توندىرەتىن مەملەكەتتەر قاتارىنا جاتقىزىلدى.
جارلىقتا كەيبىر ەرەكشە جاعدايلار قاراستىرىلعان. اتاپ ايتقاندا، ۇلتتىق مۇددەگە ساي تۇلعالارعا، اقش-تىڭ تۇراقتى زاڭدى تۇرعىندارىنا، قولدانىستاعى ۆيزاسى بار ازاماتتارعا جانە ءبىرقاتار ۆيزا ساناتتارىنا بۇل تىيىم قولدانىلمايدى.
دونالد ترامپ العاشقى پرەزيدەنتتىك مەرزىمىندە دە وسىنداي شەكتەۋلەر ەنگىزگەن بولاتىن. ول كەزدە تىيىم توعىز ەلگە قاتىستى بولدى: كۋبا، يران، ليۆيا، سولتۇستىك كورەيا، سومالي، سۋدان، سيريا، ۆەنەسۋەلا جانە يەمەن. بۇل جارلىقتى كەيىنىرەك پرەزيدەنت دجو بايدەن قىزمەتكە كىرىسكەن سوڭ جويعان ەدى.
سونداي-اق، ترامپ اكىمشىلىگى بۇعان دەيىن گارۆارد ۋنيۆەرسيتەتىنە شەتەلدىك ستۋدەنتتەردى قابىلداۋعا تىيىم سالعان. قازىرگى ۋاقىتتا ۋنيۆەرسيتەت بۇل شەشىمگە قارسى سوتتاسىپ جاتىر. گارۆاردقا وقۋعا تۇسكەن ستۋدەنتتەر اراسىندا قازاقستاندىقتار دا بار. ولار سوت شەشىمىن كۇتۋدە.
