مىندەتتى الەۋمەتتىك مەديسينالىق ساقتاندىرۋ قورىنىڭ ءتوراعاسىنىڭ ورىنباسارى عالىمجان ءابىلوۆ 400 ميلليون تەڭگەدەن استام قارجىنى جىمقىردى دەگەن كۇدىكپەن قاماۋعا الىندى.

سىبايلاس جەمقورلىققا قارسى قىزمەتتىڭ مالىمەتىنشە، جىمقىرۋ مەديسينالىق ۇيىمنىڭ "Damumed" اقپاراتتىق جۇيەسىنە مىندەتتى الەۋمەتتىك مەديسينالىق ساقتاندىرۋ شەڭبەرىندە وسكەمەن قالاسىنىڭ تۇرعىندارىنا كورسەتىلگەن قىزمەتتەر تۋرالى كورىنەۋ جالعان مالىمەتتەر ەنگىزۋ جولىمەن جاسالعان.

"ءىس جۇزىندە مەديسينالىق قىزمەتتەر كورسەتىلمەدى، وتىز مىڭنان استام "تىركەۋلەر" انىقتالدى. سونىمەن قاتار، ول جەكە مەديسينالىق مەكەمەنىڭ كاسىپكەرلىك قىزمەتىنە زاڭسىز قاتىسىپ، قوردىڭ جىمقىرعان قاراجاتىن، ونىڭ ىشىندە قىمبات مۇلىكتى ساتىپ الۋ ارقىلى زاڭداستىردى دەگەن كۇدىككە ءىلىندى"، – دەدى سىبايلاس جەمقورلىققا قارسى قىزمەت وكىلدەرى.

سوتتىڭ سانكسياسىمەن كۇدىكتى قاماۋعا الىندى. تەرگەۋ جالعاسۋدا، شەنەۋنىكتىڭ باسقا قىلمىستىق ەپيزودتارعا قاتىسى بار-جوعى تەكسەرىلەدى.

دەنساۋلىق ساقتاۋ جۇيەسى سىبايلاس جەمقورلىق تاۋەكەلدەرىنە ەڭ وسال بولىپ قالا بەرەدى جانە قوعامنىڭ ەرەكشە نازارىندا. سوڭعى ءۇش جىلدا بۇل سالادا 134 قىلمىستىق قۇقىق بۇزۋشىلىق تىركەلدى، ولار بويىنشا 57 ادام سوتتالعان.

ەسكە سالساق، مەديسينالىق ساقتاندىرۋ جۇيەسىن جەتىلدىرۋگە باعىتتالعان تۇزەتۋلەردى تالقىلاۋ بارىسىندا ءماجىلىس دەپۋتاتى مۇرات ابەنوۆ الەۋمەتتىك مەديسينالىق ساقتاندىرۋ قورى قىزمەتىنىڭ اشىقتىعىنا كۇمان كەلتىرگەنەدى.