موڭعوليانىڭ جاڭادان جاساقتالعان مينيسترلەر كابينەتىنە بايان-ولگيي ايماعىنان پارلامەنتكە سايلانعان دەپۋتات، قانداسىمىز اۋباكىر تىلەۋحان ۇلى ەنىپ وتىر. ول وتباسى، ەڭبەك جانە الەۋمەتتىك قورعاۋ ءمينيسترى لاۋازىمىنا تاعايىندالۋى ءتيىس.- دەپ حابارلايدى Qamshy.kz e-history.kz سايتىنا سىلتەمە جاساپ.

اۋباكىر تىلەۋحان ۇلى — موڭعوليا مەملەكەتتىك ۇلى حۋرالىنىڭ (پارلامەنتىنىڭ) دەپۋتاتى. 1976 جىلى سەلەنگە ايماعىندا دۇنيەگە كەلگەن. 1992 جىلى ساگااننۋۋر سومونىنداعى ورتا مەكتەپتى ءتامامداعان. 2000 جىلى ۇلان-باتور قالاسىنداعى وتگونتەنگەر ۋنيۆەرسيتەتىن حالىقارالىق قۇقىق ماماندىعى بويىنشا ءبىتىرىپ، باكالاۆر دارەجەسىن العان.

ەڭبەك جولىن سەلەنگە ايماعىنداعى «سەلەنگە تاريا» جشس-دە ديرەكتوردىڭ ورىنباسارى قىزمەتىنەن باستاعان. 2008–2015 جىلدارى بايان-ولگيي ايماعىنداعى الەۋمەتتىك دەموكراتيا – موڭعوليا جاستار وداعىنىڭ ءتوراعاسى بولعان. ال 2015–2019 جىلدار ارالىعىندا ەلدىڭ كەدەن باسقارماسىندا ىشكى اۋديت جانە باقىلاۋ ءبولىمىنىڭ باسشىسى، سونداي-اق كەدەن ءبولىمى باسشىسىنىڭ ورىنباسارى قىزمەتتەرىن اتقارعان.

2020 جىلدان بەرى مەملەكەتتىك ۇلى حۋرالدىڭ مۇشەسى. ەندى ول مينيسترلەر كابينەتىنىڭ جاڭا قۇرامىندا الەۋمەتتىك سالاعا جاۋاپتى مينيستر رەتىندە قىزمەتكە كىرىسۋى مۇمكىن.

ايتا كەتەيىك، 3 ماۋسىم كۇنى موڭعوليانىڭ سول كەزدەگى پرەمەر-مينيسترى لۋۆساننامسراين ويۋۋن-ەردەنە وتستاۆكاعا كەتكەن بولاتىن. ونىڭ ورنىنا 13 ماۋسىمدا گومبوجاۆ زاندانشاتار پرەمەر-مينيستر قىزمەتىنە كىرىستى. جاڭا ۇكىمەت قۇرامىن زاندانشاتار بۇگىن ۇلى حۋرال دەپۋتاتتارىنا تانىستىردى.