پاۆلودار وبلىسىنداعى جويقىن داۋىل: 16 ادام جاراقات الىپ، ءبىر ايەل كوز جۇمدى.

19 ماۋسىم كۇنى پاۆلودار وبلىسىندا جىلدامدىعى سەكۋندىنا 43 مەترگە دەيىن جەتكەن جويقىن داۋىل سوقتى. تابيعات اپاتى سالدارىنان 16 ادام زارداپ شەكتى، ونىڭ ىشىندە ءۇش بالا بار. وكىنىشكە قاراي، اقسۋ قالاسىندا 1968 جىلى تۋعان ايەل كوز جۇمدى.

وبلىس اكىمدىگىنىڭ حابارلاۋىنشا، داۋىلدى جەل ايماقتاعى ينفراقۇرىلىمعا ايتارلىقتاي زيان كەلتىرىپ، بىرنەشە اۋداندا ەلەكتر قۋاتىنىڭ وشۋىنە سەبەپ بولدى. وبلىس ورتالىعىندا 47 نىساننىڭ شاتىرى بۇلىنگەن، ونىڭ التاۋى — الەۋمەتتىك مەكەمە. اقسۋ مەن ەكىباستۇز قالالارىندا 23 نىسان، باياناۋىل اۋدانىندا 7 نىسان، سونداي-اق ماي مەن پاۆلودار اۋداندارىندا ءبىرقاتار عيماراتتار زاقىمداندى.

ەنەرگوجەلىلەردە دە اقاۋلار انىقتالدى. اقسۋ قالاسى مەن باياناۋىل اۋدانىندا جارىق وشكەنى تىركەلىپ وتىر.

قازىرگى ۋاقىتتا توتەنشە جاعدايدىڭ سالدارىن جويۋ جۇمىستارى ءجۇرىپ جاتىر. بايلانىس جانە ەلەكتر جەلىلەرىنىڭ 16 باعاناسى قالپىنا كەلتىرىلۋدە. اپات اۋماعىنا 300-دەن استام مامان مەن 100-دەن استام ارنايى تەحنيكا جۇمىلدىرىلعان. بارلىق شۇعىل قىزمەتتەر كۇشەيتىلگەن رەجيمدە جۇمىس ىستەپ جاتىر.