الماتى قالاسىندا ەكس-سۋديا سۆەتلانا جولمانوۆاعا قاتىستى سوت ۇكىمى شىقتى. ول اسا ءىرى كولەمدە الاياقتىق جاسادى دەگەن ايىپپەن 10 جىلعا باس بوستاندىعىنان ايىرىلدى. ءىستى الماتى قالاسىنىڭ №2 مەدەۋ اۋداندىق سوتىنىڭ سۋدياسى قانات ءارىنوۆ قارادى.

ازىرگە ۇكىم زاڭدى كۇشىنە ەنگەن جوق.

سۆەتلانا جولمانوۆاعا قاتىستى العاشقى قىلمىستىق ءىس 2021 جىلى قوزعالعان. ول كەزدە جولمانوۆا مۇددەلى تۇلعالاردىڭ پايداسىنا سوت شەشىمدەرىن شىعارۋعا جاردەمدەسىپ، سول ارقىلى الاياقتىق ارەكەتتەرگە بارعان دەگەن كۇدىككە ىلىنگەن. الايدا كەيىن بۇل ءىس توقتاتىلىپ، ول سۋديا قىزمەتىنەن بوساتىلدى.

2024 جىلدىڭ قازان ايىندا ەكس-سۋديا قايتا ۇستالىپ، وعان قاتىستى قىلمىستىق ءىس سوتقا جولداندى. تەرگەۋ دەرەكتەرىنە سايكەس، جولمانوۆا 2021 جىلدان 2024 جىلعا دەيىنگى ارالىقتا جىلجىمايتىن مۇلىك ساتىپ الۋ جانە مەملەكەتتىك تەندەر جوبالارىنا قاتىسۋعا كومەكتەسەمىن دەگەن ۋادەمەن ازاماتتاردى الداپ، ولاردىڭ سەنىمىنە كىرىپ، 1 ميلليارد تەڭگەدەن استام قاراجاتتى يەمدەنگەن.

تەرگەۋ بارىسىندا ونىڭ قىلمىستىق ارەكەتىنىڭ 48 ەپيزودى انىقتالىپ، بارلىعى ءبىر ىسكە بىرىكتىرىلگەن.