رەسەي استاناسىنداعى قازاق قاۋىمداستىعىنىڭ تانىمال تۇلعاسى پولات جامالوۆقا قاتىستى سوت ۇكىمى ماسكەۋدىڭ كۋنسيەۆو اۋداندىق سوتىندا شىقتى. بۇل تۋرالى تاۋەلسىز "DAT" باسىلىمى حابارلادى.

سوت جامالوۆتى رەسەي ارمياسىنا قاتىستى سىن جازبالارى جانە كەيبىر ەكسترەميستىك پىكىرلەردى "اقتاعانى" ءۇشىن كىنالى دەپ تانىپ، ونى جەتى جىلعا باس بوستاندىعىنان ايىردى. ايىپتاۋعا 1930-جىلدارداعى اشارشىلىق، ۋكرايناداعى سوعىس جانە رەسەيدىڭ ورتالىق ازياعا ىقپالى جونىندەگى الەۋمەتتىك جەلىدەگى جازبالار سەبەپ بولعان.

پولات جامالوۆ – ماسكەۋدەگى قازاق دياسپوراسىنىڭ بەلسەندى وكىلدەرىنىڭ ءبىرى. ول ەشقانداي ساياسي ۇيىمدارعا قاتىسپاعان، وپپوزيسيالىق قوزعالىستاردىڭ مۇشەسى دە ەمەس. سوڭعى جىلدارى مادەني جانە ءبىلىم بەرۋ جوبالارىمەن اينالىسىپ، ەتنيكالىق قازاقتاردىڭ رەسەيگە بەيىمدەلۋىنە قولداۋ كورسەتىپ كەلگەن.

الايدا ونىڭ الەۋمەتتىك جەلىدەگى پىكىرلەرى تەرگەۋ ورگاندارى تاراپىنان "مەملەكەتتىك قۇرىلىمداردى جامانداۋ" جانە "قارۋلى كۇشتەردىڭ بەدەلىنە نۇقسان كەلتىرۋ" رەتىندە باعالانىپ، اۋىر ايىپتار تاعىلدى.

سوت شەشىمى قۇقىق قورعاۋ ۇيىمدارى مەن شەتەلدەگى قازاق دياسپوراسىنىڭ الاڭداۋشىلىعىن تۋدىردى. ماسكەۋلىك ادۆوكاتتاردىڭ ءبىرى جامالوۆقا قاتىستى ۇكىمدى سىناپ:

– ءقازىر ادامدار ناقتى ىس-ارەكەتتەرى ءۇشىن ەمەس، ءوز كوزقاراسى ءۇشىن جازاعا تارتىلادى. جامالوۆ ەشقانداي زورلىقتى قولداعان جوق، تەك پىكىرىن اشىق ءبىلدىردى. ءبىراق سونىڭ ءوزى وعان اۋىر جازاعا اينالدى، – دەدى.

جامالوۆتىڭ ادۆوكاتتارى ۇكىمگە قارسى اپەللياسيالىق شاعىم تۇسىرەتىندەرىن مالىمدەدى. الايدا قۇقىق قورعاۋشىلار قازىرگى رەسەي جاعدايىندا ءىستى قايتا قاراۋعا مۇمكىندىك وتە شەكتەۋلى ەكەنىن ايتادى.