تاراز قالاسىنداعى جەڭىس ساياباعىندا ورنالاسقان جيىرماعا جۋىق اتتراكسيوننىڭ ءتيىستى رۇقسات قۇجاتتارىنسىز جۇمىس ىستەپ جاتقانى انىقتالدى. ولاردىڭ قاتارىندا قۇنى 80 ميلليون تەڭگەنى قۇرايتىن الىپ شولۋ دوڭگەلەگى دە بار.

اتالعان اۋماق 2019 جىلى "جاسىل ەل تاراز" كوممۋنالدىق قىزمەتى ارقىلى جەرگىلىكتى كاسىپكەرگە ءۇش جىل مەرزىمگە جالعا بەرىلگەن. الايدا كەيىننەن بۇل كەلىسىمشارتتىڭ زاڭسىز جاسالعانى بەلگىلى بولىپ، جەر تەلىمى مەملەكەت مەنشىگىنە قايتارىلعان. سوعان قاراماستان، كاسىپكەر اتتراكسيونداردى پايدالانۋدى توقتاتپاعان.

بيىل كوكتەمدە كاسىپكەر شولۋ دوڭگەلەگىن ءوز بەتىمەن ورناتىپ، قۇرىلىس جۇمىستارىن باستاعان. قالا اكىمدىگى تاراپىنان بىرنەشە رەت اۋىزشا جانە جازباشا ەسكەرتۋ جاسالعانىمەن، ول ەسكەرتۋلەرگە ءمان بەرمەي، قىزمەتىن جالعاستىرا بەرگەن. وسىعان بايلانىستى جەرگىلىكتى بيلىك سوتقا جۇگىنۋگە ءماجبۇر بولدى.

— وسى جىلدىڭ ناۋرىز ايىندا شولۋ دوڭگەلەگىنىڭ قۇرىلىسى باستالدى. ءبىز اكىمدىك جانە جەرگىلىكتى پوليسيا تاراپىنان ءۇش مارتە ەسكەرتۋ جاسادىق. جەر تەلىمى مەملەكەت مەنشىگىندە ەكەنىن جانە كەز كەلگەن قۇرىلىسقا ارنايى رۇقسات قاجەت ەكەنىن تۇسىندىردىك. بۇل تالاپتار سوتقا جولدانعان تالاپ-ارىزدا دا ناقتى كورسەتىلگەن، — دەدى تاراز قالاسى اكىمىنىڭ ورىنباسارى نۇرسۇلتان يسابەكوۆ.

قازىرگى تاڭدا اكىمدىك زاڭسىز ورناتىلعان اتتراكسيونداردى الىپ تاستاپ، اۋماقتى بوساتۋعا كۇش سالىپ جاتىر. ءىس سوت قاراۋىندا.