سىبايلاس جەمقورلىققا قارسى قىزمەت ءماجىلىس دەپۋتاتى ءادىل جۇبانوۆقا تيەسىلى دەگەن «باتىساليانسستروي» ج ش س كومپانياسىن تەكسەرىپ جاتىر. بۇل تۋرالى Telegram-داعى «زا نامي ۋجە ۆىەحالي» ارناسى حابارلاپ، مەملەكەتتىك ساتىپ الۋلار سالاسىنداعى زاڭبۇزۋشىلىقتارعا قاتىستى جازبالارمەن بولىسكەن. ارنانىڭ دەرەگىنشە، ماتەريالدار تىركەلىپ، اتىراۋ وبلىسى بويىنشا ىشكى مەملەكەتتىك اۋديت دەپارتامەنتىنە جولدانعان.

ۆەدومستۆونىڭ رەسمي مالىمدەۋىنشە:

«قازىرگى ۋاقىتتا دەپارتامەنت تاراپىنان لاۋازىمدى تۇلعالار مەن «باتىساليانسستروي» ج ش س اراسىندا مۇددەلەر قاقتىعىسىنىڭ بار-جوعى قاراستىرىلىپ جاتىر».

اتالعان كومپانيانى بۇعان دەيىن قازىرگى اتىراۋ وبلىسى اكىمىنىڭ ورىنباسارى قايرات نۇرتايەۆ باسقارعان. قازىرگى زاڭدى ديرەكتور — جاناباي جۇبانوۆ، ول دەپۋتاتتىڭ تۋىسى بولۋى مۇمكىن دەگەن بولجام بار.

قازاقستان زاڭناماسىنا سايكەس، دەپۋتاتتاردىڭ بيزنەسكە يەلىك ەتۋگە قۇقىعى بار، ءبىراق ونى باسقارۋعا قاتىسۋعا تىيىم سالىنعان. قازىرگى تەكسەرىستىڭ نەگىزگى باعىتى وسى تالاپتىڭ ورىندالۋىن انىقتاۋعا باعىتتالىپ وتىر.

«باتىساليانسستروي» مەملەكەتتىك تاپسىرىستار نارىعىندا بەلسەندى جۇمىس ىستەيدى. 2016 جىلدان بەرى كومپانيا مەملەكەتتىك مەكەمەلەرمەن جالپى سوماسى 15،2 ميلليارد تەڭگەنى قۇرايتىن 141 كەلىسىمشارت جاساسقان. بۇل كەلىسىمدەردىڭ باسىم بولىگى اتىراۋ وبلىسىنداعى قالالىق جانە اۋىلدىق اكىمدىكتەرمەن بايلانىستى.