وزبەكستان پرەزيدەنتى شاۆكات ميرزيويەۆتىڭ ۇلكەن قىزى سايدا ميرزيويەۆا پرەزيدەنت اكىمشىلىگىنىڭ باسشىسى قىزمەتىنە تاعايىندالدى. بۇل تۋرالى مەملەكەت باسشىسىنىڭ باسپا ءسوز حاتشىسى شەرزود اسادوۆ ءوزىنىڭ Telegram-ارناسىندا حابارلادى.
"پرەزيدەنت اكىمشىلىگىنىڭ قۇرىلىمىنا وزگەرىستەر ەنگىزىلدى. پرەزيدەنت اكىمشىلىگىنىڭ باسشىسى دەگەن جاڭا لاۋازىم ەنگىزىلدى. وزبەكستان رەسپۋبليكاسى پرەزيدەنتىنىڭ جارلىعىمەن سايدا شاۆكاتوۆنا ميرزيويەۆا وسى قىزمەتكە تاعايىندالدى"، – دەلىنگەن رەسمي حابارلامادا.
باسپا ءسوز حاتشىسىنىڭ مالىمدەۋىنشە، مەملەكەت باسشىسى بۇدان بولەك بىرنەشە كادرلىق وزگەرىستەر جاساعان.
سايدا ميرزيويەۆا بۇعان دەيىن — 2023 جىلعى 25 تامىزدان بەرى — پرەزيدەنتتىڭ كومەكشىسى قىزمەتىن اتقارىپ كەلگەن. قازىرگى تاڭدا ول 40 جاستا جانە شاۆكات ميرزيويەۆتىڭ تۇڭعىش قىزى بولىپ تابىلادى.
ب ا ق دەرەكتەرىنە سايكەس، پرەزيدەنتتىڭ كىشى قىزى شاحنوزا ميرزيويەۆا دا مەملەكەتتىك قىزمەتتە. ول — ۇلتتىق الەۋمەتتىك قورعاۋ اگەنتتىگى ديرەكتورىنىڭ ءبىرىنشى ورىنباسارى. جاقىندا عانا شاحنوزا ميرزيويەۆا رەسپۋبليكالىق پاراليمپيادا كوميتەتى ءتوراعاسىنىڭ ءبىرىنشى ورىنباسارى بولىپ سايلانعان. پرەزيدەنتتىڭ تاعى ءبىر بالاسى — ۇلى ميراليشەر ميرزيويەۆ تۋرالى كوپ اقپارات جوق.
