جەتىسۋ وبلىسىندا جول-كولىك وقيعاسى سالدارىنان ەكى پوليسيا قىزمەتكەرى قىزمەتتىك مىندەتىن اتقارۋ بارىسىندا قازا تاپتى. بۇل تۋرالى ىشكى ىستەر ءمينيسترى ەرجان سادەنوۆ مالىمدەدى.
— قىزمەتتىك بورىشىن وتەۋ كەزىندە جول اپاتىنان قازا تاپقان جەتىسۋ وبلىسى پوليسيا دەپارتامەنتىنىڭ قىزمەتكەرلەرى — پوليسيا مايورى ارنۇر الحانوۆ پەن پوليسيا اعا لەيتەنانتى شىڭعىس اسىلبەكوۆتىڭ تۋىستارى مەن جاقىندارىنا كوڭىل ايتامىن. ولاردىڭ ەسىمدەرى ارىپتەستەرىنىڭ جادىندا ماڭگى ساقتالادى، — دەدى مينيستر.
سادەنوۆتىڭ ايتۋىنشا، ىشكى ىستەر مينيسترلىگى قازا تاپقان قىزمەتكەرلەردىڭ وتباسىنا قاجەتتى كومەك كورسەتەدى.
ايتا كەتەيىك، بۇعان دەيىن باتىس قازاقستان وبلىسى، بايتەرەك اۋدانىنا قاراستى دوستىق اۋىلىندا پوليسيا قىزمەتكەرىنىڭ ءمايىتى تابىلعانى حابارلانعان. الدىن الا مالىمەت بويىنشا، ول وزىنە-وزى قول جۇمساعان.
