الماتى وبلىسىندا جازعى شومىلۋ ماۋسىمىنىڭ باستالۋىنا بايلانىستى سۋ ايدىندارىنىڭ قاۋىپسىزدىگى مەن جاعاجايلاردىڭ سانيتاريالىق جاعدايى ەرەكشە باقىلاۋعا الىندى. بۇل تۋرالى الماتى وبلىسىنىڭ وڭىرلىك كوممۋنيكاسيالار قىزمەتىنىڭ اقپاراتتىق الاڭىندا وتكەن باسپا ءسوز ءماسليحاتىندا وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى يسمايلوۆ مارات مالىمدەدى.

دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سايكەس، الەمدەگى اۋرۋلاردىڭ 80% ساپاسىز سۋمەن بايلانىستى. سوندىقتان سۋ وبەكتىلەرىنىڭ سانيتاريالىق جاعدايى – حالىق دەنساۋلىعى ءۇشىن اسا ماڭىزدى ماسەلە.

الماتى وبلىسىندا 130 دەمالىس ورنى باقىلاۋعا الىنعان. ونىڭ ىشىندە 90 قونايەۆ قالاسىندا، ەڭبەكشىقازاق، بالقاش جانە ىلە اۋداندارىندا ورنالاسقان. سونىمەن قاتار، 33 قالا سىرتىنداعى وقۋشىلار لاگەرى دە سانيتاريالىق تەكسەرۋدەن وتۋدە.

دەپارتامەنت جىل سايىن ماۋسىم باستالار الدىندا سۋ مەن جاعاجاي قۇمىن زەرتحانالىق تەكسەرۋدەن وتكىزەدى. بيىلعى ماۋسىمعا دايىندىق اياسىندا 147 سۋ 51 توپىراق سىناماسى الىنعان.

شومىلۋعا ارنالعان سۋ ايدىندارىن پايدالاناتىن كاسىپكەرلەر ق ر دەنساۋلىق ساقتاۋ مينيسترلىگىنىڭ سانيتاريالىق ەرەجەلەرىنە سايكەس سانيتارلىق-ەپيدەميولوگيالىق قورىتىندى الۋعا مىندەتتى. جاعاجاي اۋماعىندا كولەڭكە تۇسىرەتىن شاتىرلار، شەزلونگتار، كابينالار، تازالىققا ارنالعان قۇرالدار ورناتىلىپ، كۇن سايىن دەزينفەكسيا مەن تازالاۋ جۇمىستارى جۇرگىزىلۋى ءتيىس.

يسمايلوۆ مارات جاعاجايدى تاڭداۋ كەزىندە بىرنەشە قاراپايىم ەرەجەنى ساقتاۋعا شاقىردى. اتاپ ايتقاندا، دەمالىس ورنى لاس اعىندى سۋلاردان، مال جايىلىمىنان جانە ءوندىرىس ورىندارىنان كەمىندە 500 مەتر قاشىقتىقتا ورنالاسۋى ءتيىس. بالالاردىڭ شومىلۋىنا تەك اۋا تەمپەراتۋراسى +23°C جانە سۋ تەمپەراتۋراسى +20°C بولعاندا عانا رۇقسات بەرىلەدى.

ءبىزدىڭ ماقساتىمىز – حالىقتىڭ ءقاۋىپسىز دەمالىسىن قامتاماسىز ەتۋ. سوندىقتان ءاربىر دەمالىس ورنىنىڭ سانيتاريالىق جاعدايى قاتاڭ باقىلاۋدا بولادى، — دەپ قورىتىندىلادى ءسوزىن يسمايلوۆ مارات.