الماتى وبلىسىنىڭ كونايەۆ قالاسى سوڭعى جىلدارى قارقىندى دامۋدا. قالا اكىمى اسحات بەردىحانوۆتىڭ ايتۋىنشا، ينفراقۇرىلىمدى جەتىلدىرۋ – تۇرعىنداردىڭ تۇرمىس ساپاسىن ارتتىرۋداعى باستى مىندەتتەردىڭ ءبىرى.

ءۇش جىل ىشىندە قالادا ينجەنەرلىك جەلىلەردى جاڭارتۋ جۇمىستارى بەلسەندى جۇرگىزىلدى. جالپى 106 شاقىرىم سۋ، كارىز، ەلەكتر جانە گاز جەلىلەرى قايتا جوندەلدى. سونىمەن قاتار، 19 شاقىرىم اۆتوكولىك جولى جاڭارتىپ، كولىك ينفراقۇرىلىمى ايتارلىقتاي جاقساردى، بۇل ەكونوميكالىق مۇمكىندىكتەردى كەڭەيتۋگە ىقپال ەتتى.

قالاداعى 16،1 شاقىرىم ەلەكتر جەلىلەرى تولىق جاڭارتىلىپ، ەسكى پودستانسيالار زاماناۋي قۇرىلعىلارمەن اۋىستىرىلدى. بۇل ەلەكترمەن جابدىقتاۋدى تۇراقتاندىرىپ، ەنەرگيا ۇزدىكسىز بەرىلۋىن قامتاماسىز ەتتى.

سۋمەن جابدىقتاۋ مەن كارىز جۇيەلەرى دە جاڭارتىلۋدا. قالادا جالپى قۇنى 1،9 تريلليون تەڭگەدەن اساتىن 80-گە جۋىق ينفراقۇرىلىمدىق نىسان سالىنىپ جاتىر. ولاردىڭ ىشىندە 11 كارىزدىك ستانسياسى قالپىنا كەلتىرىلۋدە. وسى جۇمىستار تۇرعىنداردىڭ سانيتارلىق-گيگيەنالىق جاعدايىن جاقسارتىپ، ەكولوگيالىق احۋالدى وڭالتادى دەپ كۇتىلۋدە.

ينفراقۇرىلىمدى جاڭارتۋ جوبالارى كونايەۆقا ينۆەستورلاردى تارتۋعا مۇمكىندىك بەرۋدە. قالادا جاڭا وندىرىستىك جانە تۇرعىن ءۇي ايماقتارى پايدا بولىپ، جاڭا جۇمىس ورىندارى اشىلۋدا، بۇل ەكونوميكالىق دامۋدىڭ جاڭا دەڭگەيىنە جەتۋگە جول اشادى.

قالا اكىمىنىڭ ايتۋىنشا، ينجەنەرلىك جەلىلەردىڭ جاڭارتىلۋى ارقىلى كونايەۆ تۇرعىندارىنا ساپالى قىزمەتتەر كورسەتىلىپ، قالا تۇراقتى دامۋدىڭ جاڭا كەزەڭىنە وتۋدە.